తన తోటి స్నేహితుడుపై వున్న అమితమైన ప్రేమ అతడిని దారుణం చేసేందుకు ప్రోత్సహించింది. ఉన్మాదిగా మారిన సదరు యువకుడు తన స్నేహితుడి జీవితాన్ని సర్వనాశనం చేసాడు. ఆపరేషన్ థియేటర్‌కి తీసుకుని వెళ్లి స్నేహితుడిని కాస్తా స్నేహితురాలిగా మార్చేసాడు. ఈ దారుణం ఉత్తర ప్రదేశ్ రాష్ట్రంలో జరిగింది.
పూర్తి వివరాలు ఇలా వున్నాయి. ముజఫర్ నగర్‌కు చెందిన ఓంప్రకాశ్ అనే వ్యక్తి 20 ఏళ్ల యువకుడితో స్నేహం కొనసాగిస్తున్నాడు. ఈ క్రమంలో ఓరోజు సదరు యువకుడు తనకు అనారోగ్యంగా వుందని చెప్పడంతో ఆసుపత్రికి వెళ్దాం పద అని తీసుకెళ్లాడు. అక్కడ వైద్యులు... చిన్నపాటి శస్త్రచికిత్స చేయాలని ఆ యువకుడితో చెప్పారు. అది నిజమని నమ్మిన యువకుడు అందుకు సమ్మతించాడు. అంతే.. అతడికి మత్తు మందు ఇచ్చి అతడికి లింగమార్పిడి శస్త్ర చికిత్స చేసేసారు. పురుషుడిగా వున్న అతడిని స్త్రీగా మార్చేసారు.
ఆపరేషన్ పూర్తయ్యాక మత్తు వదిలి సదరు యువకుడు కళ్లు తెరిచి చూసి తనకు లింగమార్పిడి చేసారని గమనించాడు. పక్కనే వున్న ఓంప్రకాష్.. ఇదంతా నీకోసమే చేసాననీ, మనిద్దరం పెళ్లి చేసుకుని హాయిగా వుండొచ్చని చెప్పాడు. విషయాన్ని ఎవరికైనా చెబితే బాధిత యువకుడి తల్లిదండ్రులను హతమారుస్తానని బెదిరించాడు. ఐతే ఎలాగో ధైర్యం తెచ్చుకున్న యువకుడు విషయాన్ని తన పేరెంట్స్ తో కలిసి ఈ నెల 16న పోలీసులకు ఫిర్యాదు చేసాడు. దీంతో నిందితుడు ఓంప్రకాష్‌ను పోలీసులు అరెస్టు చేసి దర్యాప్తు చేస్తున్నారు.
