హైదరాబాద్ నగరంలోని పాతబస్తీలో జరిగిన ఓ డ్యాన్సర్ హత్య కేసులోని మిస్టరీని ఫలక్‌నుమా పోలీసులు ఛేదించారు. ఇద్దరు నిందితులను మంగళవారం అరెస్టు చేసి రిమాండ్‌కు తరలించారు.
ఈ హత్యపై పోలీసులు వెల్లడించిన వివరాల మేరకు... 30 యేళ్ళ నృత్యకారిణికి వివాహాలు, ఇతర శుభకార్యాల్లో నృత్యం చేస్తూ తన మొదటి, రెండో భర్తల ద్వారా కలిగిన ఏడుగురు సంతానాన్ని పోషించుకుంటూ జీవనం సాగిస్తుంది. ఈ క్రమంలో ఈమె సోమవారం ముస్తాఫానగర్‌లోని అద్దె ఇంట్లో అనుమానాస్పద స్థితిలో మృతి చెందింది. దీనిపై పోలీసులు కేసు నమోదు చేసి విచారణ ప్రారంభించారు.
ఆమెకు మొదటి భర్త విడాకులు ఇవ్వడంతో కొన్నేళ్ల క్రితం మరో వ్యక్తిని పెళ్లి చేసుకుంది. ఏడాది క్రితం రెండో భర్త మృతి చెందాడు. చంచల్‌గూడకు చెందిన కారు డ్రైవర్‌ మహ్మద్‌ అఫ్సర్‌(30)తో పరిచయం ఏర్పడింది. కొన్నాళ్లుగా వారిద్దరూ సహజీవనం చేస్తున్నారు.
ఆమె తనను పెళ్లి చేసుకోవాలని అఫ్సర్‌పై ఒత్తిడి తేవడంతో డ్యాన్స్‌ మానేస్తే చేసుకుంటానని చెప్పాడు. ఈనెల 7న అర్థరాత్రి తన మిత్రుడైన ఓల్డ్‌ మలక్‌పేట శంకర్‌నగర్‌కు చెందిన మహ్మద్‌ నహెద్‌(22)తో కలిసి నృత్యకారిణి ఇంటికి వెళ్లాడు. అక్కడ వీరిద్దరూ మరోమారు పెళ్లి విషయమై మళ్లీ గొడవపడ్డారు. దీంతో ఆగ్రహంతో నృత్యకారిణి గొంతు నులిమాడు. మహ్మద్‌ నహెద్‌ చున్నీతో ఉరి బిగించాడని పోలీసులు వివరించారు.
