పవన్ కళ్యాణ్ - హరీష్ శంకర్‌ల కాంబినేషన్‌లో మరో చిత్రం రానుంది. వీరిద్దరి కాంబినేషన్‌లో గతంలో గబ్బర్ సింగ్ వచ్చింది. ఇపుడు మళ్లీ 11 యేళ్ళ తర్వాత చిత్రం రానుంది. 'ఉస్తాద్ భగత్ సింగ్' పేరుతో తెరకెక్కుతుంది. ప్రస్తుతం శరవేగంగా షూటింగ్ జరుగుతోంది. ఈ సినిమా నుంచి తాజాగా ఓ అప్డేట్ వచ్చింది.
హైదరాబాద్ నగరంలో ఆదివారంతో ఓ భారీ యాక్షన్ షెడ్యూల్‌ను పూర్తి చేసినట్టు చిత్ర బృందం తెలిపింది. ఆర్ట్ డైరెక్టర్ ఆనంద్ సాయి వేసిన ప్రత్యేక సెట్లో యాక్షన్ సీక్వెల్స్‌ను తెరకెక్కించారు. ఇది ఇంటర్వెల్‌కు ముందు వచ్చే యాక్షన్ ఎపిసోడ్ అని తెలుస్తోంది. మరిన్ని వివరాలను వెల్లడిస్తామని సోషల్ మీడియా ద్వారా ప్రకటించారు.
దర్శకుడు హరీష్ శంకర్ భారీ యాక్షన్ ఎంటర్‌టైనర్‌గా ఈ చిత్రాన్ని రూపొందిస్తున్నాడు. పవర్ స్టార్ లుక్స్ పాటు ఇప్పటికే విడుదలైన గ్లింప్స్ సినిమాపై అంచనాలు పెంచింది. పవన్ సరసన శ్రీలీల హీరోయిన్‌గా నటిస్తోంది. దేవిశ్రీ ప్రసాద్ సంగీతం. మైత్రీ మూవీ మేకర్స్ నవీన్ యెర్నేని, వై.రవిశంకర్ నిర్మిస్తున్న ఈ సినిమాలో అశుతోష్ రాణా, నవాబ్ షా, 'కేజీఎఫ్' ఫేమ్ అవినాశ్, గౌతమి, నర్రా శ్రీను, నాగ మహేష్, టెంపర్ వంశీ తదితరులు ఇతర ముఖ్య పాత్రలు పోషిస్తున్నారు.
