సినీ హీరో డాక్టర్ రాజశేఖర్ తృటిలో ప్రాణాపాయం నుంచి బయటపడ్డారు. బుధవారం తెల్లవారు జామున జరిన రోడ్డు ప్రమాదంలో ఆయన ప్రాణాలతో బయటపడ్డారు. బుధవారం తెల్లవారుజామున 3 గంటల సమయంలో హైదరాబాద్, అవుటర్ రింగ్ రోడ్డుపై పెద్ద గోల్కొండ వద్ద హీరో రాజశేఖర్ ప్రయాణిస్తున్న ఫార్చ్యూనర్ కారు ప్రమాదానికి గురైంది.
ఈ ప్రమాదంలో రాజశేఖర్‌తో పాటు కారులో ప్రయాణిస్తున్న మరో వ్యక్తికి గాయాలు అయ్యాయి. వీరిద్దరికీ ప్రస్తుతం ఓ ప్రైవేటు ఆసుపత్రిలో చికిత్స జరుగుతోంది. ప్రమాదం జరిగిన వెంటనే ఎయిర్ బ్యాగులు తెరుచుకోవడంతో ప్రాణగండం తప్పింది. కానీ, ఈ ప్రమాదంలో కారు మాత్రం నుజ్జునుజ్జు అయింది.
అయితే, ఈ ప్రమాదానికి సంబంధించి పూర్తి వివరాలు తెలియరానప్పటికీ.. ఆస్పత్రి వర్గాల సమాచారం మేరకు.. రాజశేఖర్ కాళ్లు, చేతులకు గాయాలు అయినట్టు సమాచారం. కారులో వెనుక కూర్చున్న వ్యక్తికి తీవ్రగాయాలు అయినట్టు తెలుస్తోంది.
విజయవాడలో జరిగిన ఓ కార్యక్రమంలో పాల్గొనే నిమిత్తం వెళ్లిన రాజశేఖర్, ఆ కార్యక్రమం అనంతరం హైదరాబాద్‌కు తిరిగి వస్తూ రామోజీ ఫిల్మ్ సిటీ దాటిన తర్వాత, సిటీలోకి రాకుండా, నేరుగా జూబ్లీహిల్స్‌కు చేరుకునే క్రమంలో అవుటర్‌పై ప్రయాణించారని తెలుస్తోంది. ఈ క్రమంలోనే ప్రమాదం జరిగింది.
