కిరణ్ అబ్బవరం - ప్రియాంక జవాల్కర్ జంటగా రూపొందిన చిత్రం 'ఎస్.ఆర్.కల్యాణ మండపం'. ఈ నెల 6వ తేదీన థియేటర్లలో రిలీజ్ అయింది. శ్రీధర్ దర్శకత్వం వహించిన ఈ సినిమాలో, సాయికుమార్ కీలకమైన పాత్రను పోషించారు. నిర్మాతలు ప్రమోద్ - రాజు ఈ సినిమా ప్రమోషన్స్ కోసం పెద్ద మొత్తంలో ఖర్చు చేశారు.
అయితే, ఆ వారంలో విడుదలైన కొత్త చిత్రాల్లోనే అత్యధిక కలెక్షన్లు రాబట్టింది. అయితే అదే ఊపును మరికొన్ని రోజుల పాటు కొనసాగిస్తుందనే దర్శక నిర్మాతల అంచనాలు తప్పాయి. కొద్దిపాటి లాభాలతో సినిమా ఓకే అనిపించుకుంది. ఆ సినిమాను ఇప్పుడు ఓటీటీ ద్వారా వదలడానికి సన్నాహాలు జరుగుతున్నాయి.
ఈ సినిమా ఓటీటీ హక్కులు 'ఆహా' సంస్థ సొంతం చేసుకుంది. సాధ్యమైనంత త్వరలోనే స్ట్రీమింగ్ చేయనున్నారని అంటున్నారు. 'ఆహా' నుంచి స్ట్రీమింగ్ డేట్ రానున్నట్టుగా చెబుతున్నారు. ప్రేమ, యాక్షన్, ఎమోషన్‌తో కూడిన ఈ సినిమా 'ఆహా'లో ఏ మేరకు రేటింగ్ సాధిస్తుందో వేచిచూడాల్సిందే.
