దీపం ఉండగానే ఇల్లు చక్కబెట్టుకోవాలి అని ఒక సామెత ఉంది... పాపం రష్మికకు అది తెలుసో తెలియదో కానీ అగ్ర దర్శకులు చేసే ఆఫర్లను కూడా తిరస్కరించేయడం చూస్తూంటే... అటువంటి సామెత కన్నడంలో ఉన్నట్లు లేదేమో మరి... అనిపిస్తోంది.
వివరాలలోకి వెళ్తే... ‘ఛలో’ సినిమాతో టాలీవుడ్‌లో తెరంగేట్రం చేసిన కన్నడ భామ రష్మిక మందన్న... తన మొదటి సినిమాతోనే టాలీవుడ్ ప్రేక్షకులను బుట్టలో వేసేసుకున్న ఈ భామ.. ఆ తర్వాత వచ్చిన ‘గీత గోవిందం’ సినిమా సాధించిన విజయంతో స్టార్ హీరోయిన్ స్టేటస్‌ని కూడా కొట్టేసింది. దీంతో ఆమె పేరు ఒక్కసారిగా సినీ పరిశ్రమలో మారుమోగిపోవడమే కాకుండా అవకాశాలు కూడా క్యూకట్టేసాయి. ఈ నేపథ్యంలో ఇటు టాలీవుడ్‌తో పాటు అటు బాలీవుడ్ బడా దర్శకుల చూపు కూడా రష్మికపై పడింది.
వివరాలలోకి వెళ్తే... బాలీవుడ్ దర్శకుడు సంజయ్ లీలా భన్సాలీ తాను రూపొందించబోయే కొత్త సినిమాలో ఇటీవలి కాలంలో రష్మికకి ఓ పాత్రని ఆఫర్ చేస్తూ సంప్రదించడం జరిగిందట. భన్సాలీ తెరకెక్కించనున్న ఈ సినిమాలో బాలీవుడ్ నటుడు రణ్‌దీప్ హుడాతో నటించనున్నారట. అయితే ఈ సినిమాలో తన పాత్ర నిడివి తక్కువగా ఉందనే కారణం చూపుతూ రష్మిక ఈ ఆఫర్‌ని సున్నితంగా తిరస్కరించిందని సమాచారం. ఈ వార్త కాస్తా బయటకు రావడంతో... రష్మికకు భలే డిమాండ్ ఉందే! అనే టాక్ సినీ వర్గాలలో మొదలైపోయింది. మరి ఇలా చేతికి అందివచ్చిన అవకాశాలను కూడా వదిలేసుకోవడం మంచిదో కాదో కానీ ఆవిడకి అనుభవమే నేర్పవలసి ఉంది కదా.
