టాలీవుడ్ హీరో ప్రభాస్ - పూజా హెగ్డే జంటగా నటిస్తున్న పీరియాడిక్ లవ్ స్టోరి 'రాధే శ్యామ్'. కె.రాధాకృష్ణ కుమార్ దర్శకత్వం వహించే ఈ చిత్రం 1960ల నాటి ఇటలీ బ్యాక్ డ్రాప్‌లో నడిచే ఈ మూవీలో విక్రమాదిత్యగా ప్రభాస్.. ప్రేరణగా పూజా కనిపించనున్నారు.
ఈ చిత్రం ఎపుడు విడుదలవుతుందా అని ఎంతో ఆతృతగా ఎదురు చూస్తున్నారు. ఈ నేపథ్యంలో చిత్ర బృందం తాజాగా విడుదల తేదీని ప్రకటించింది. 2018లోనే అధికారికంగా ప్రకటించిన 'రాధే శ్యామ్' అనేక కారణాలతో లేట్ అవుతూ వచ్చింది.
ఆఖరి దశకు చేరుకునేసరికి కరోనా ప్రభావం పడటంతో షూటింగ్ ఆలస్యమైంది. అయితే ఇటీవలే హైదరాబాద్‌లో బ్యాలెన్స్ షూటింగ్ తిరిగి ప్రారంభించిన మేకర్స్ ఫైనల్ షెడ్యూల్ చిత్రీకరణ విజయవంతంగా పూర్తి చేశారు.
ఈ క్రమంలో సినిమాకి సంబంధించిన అప్‌డేట్ ఇవ్వనున్నట్టు వెల్లడించిన 'రాధే శ్యామ్' బృందం అన్నట్టుగానే ట్విట్టర్ వేదికగా ఈ చిత్రాన్ని 2022 జనవరి 14న మకర సంక్రాంతికి విడుదల చేయనున్నట్టు ప్రభాస్ లుక్‌ను రిలీజ్ చేసి అధికారకంగా ప్రకటించారు.
ఇప్పటికే 2022 సంక్రాంతి బరిలో పవన్ కళ్యాణ్ - రానా మల్టీస్టారర్, సూపర్ స్టార్ మహేష్ బాబు నటిస్తున్న సర్కారు వారి పాట దిగబోతున్నట్టు ప్రకటించగా ఇప్పుడు ప్రభాస్ కూడా తన చిత్రం 'రాధే శ్యామ్'ని దింపుతున్నట్టు ప్రకటించాడు. సో, 2022 సంక్రాంతికి పలువురు అగ్రహీరోలు బాక్సాఫీస్ వద్ద పోటీపడనున్నారు.
