పవర్ స్టార్ పవన్ కళ్యాణ్ తన 50వ పుట్టినరోజు వేడుకలను గురువారం జరుపుకున్నారు. ఈ సందర్భంగా ఆయన నటించనున్న ప్రాజెక్టులతో తన అభిమానులకు సర్‌ప్రైజ్ ఇచ్చారు. ఏకంగా నాలుగు ప్రాజెక్టుల వివరాలను మూవీ మేకర్స్ వెల్లడించారు.
తొలుత "భీమ్లా నాయక్" నుంచి టైటిల్ సాంగ్ విడుదల కాగా.. అనంతరం "హరిహర వీరమల్లు" సినిమా విడుదల తేదీని చిత్ర యూనిట్ ప్రకటించింది. ఈ మూవీ వచ్చే ఏడాది ఏప్రిల్ 29వ తేదీ విడుదల చేయనున్నట్టు ప్రకటించారు.
అంటే జనవరి నెల సంక్రాంతి బరిలో 'భీమ్లానాయక్'ను రిలీజ్ చేసి, ఏప్రిల్ నెలలో వేసవి కానుకగా హరిహర వీరమల్లు మూవీస్‌తో మూడు నెలల తేడాతో పవన్ తన అభిమానులను అలరించనున్నారు.
అంతేకాకుండా సురేందర్ రెడ్డి దర్శకత్వం వహిస్తున్న మూవీ అప్‌డేట్‌ను వెల్లడించారు. ఈ మేరకు ఓ పోస్టర్‌ను యూనిట్ విడుదల చేసింది. సదరు పోస్టర్‌లో ‘యథా కాలం… తథా వ్యవహారం’ అంటూ రాసుకొచ్చారు.
అంతే కాదు ఈ పోస్టర్‌లో హైటెక్ సిటీతో పాటు గన్ కూడా కనిపిస్తోంది. అంటే ఈ సినిమా క్రైమ్ నేపథ్యంలో తెరకెక్కనుందని తెలుస్తోంది. ఈ మూవీకి స్టార్ రైటర్ వక్కంతం వంశీ కథను అందిస్తున్నాడు.
మరోవైపు, గబ్బర్ సింగ్ కాంబో రిపీట్ కానుంది. ఈ చిత్ర దర్శకుడు హరీష్ శంకర్ దర్శకత్వంలో తెరకెక్కుతున్న సినిమా పోస్టర్ కూడా విడుదలైంది. మైత్రీ మూవీ మేకర్స్ సంస్థ ఈ సినిమాను నిర్మిస్తోంది. గబ్బర్ సింగ్ సినిమా రానున్న చిత్రం కావడంతో అభిమానుల్లో భారీ అంచనాలు నెలకొన్నాయి.
