కాంతారా సినిమా ఊహించని రెస్పాన్స్ వస్తోంది. ఈ సినిమా కలెక్షన్లు అదుర్స్ అనిపిస్తున్నాయి. తెలుగు, తమిళ, హిందీ, మలయాళంలో విడుదలైన కాంతార సినిమాకు కలెక్షన్లు ఎలా వస్తున్నాయో.. వివాదాలు కూడా వీడటం లేదు. ఇప్పటికే ఈ చిత్రంలోని వరాహ రూపం సాంగ్‌పై కేరళలోని కోయిక్కోడ్ కోర్టు స్టే విధించిన సంగతి తెలిసిందే.
ఈ పాటను ఎక్కడా ప్లే చేయకూడదని.. థియేటర్లలో అసలు వినిపించకూడదంటూ ఉత్తర్వులు జారీ చేసింది. ఇక తాజాగా మరోసారి చిత్రబృందానికి పాలక్కాడ్ కోర్టు నుంచి షాక్ తగిలింది. కేరళలోని పాలక్కాడ్ స్థానిక కోర్టు ఈ పాటను నిలిపివేయాలని ఆదేశించింది.
వరాహరూపం పాట కాపీ చేశారంటూ తైక్కుడం బ్రిడ్జ్ యూనిట్ ఆరోపించింది. తన నవరసం ట్యూన్ను వరాహరూపం పాటలో ఉపయోగించారని ఆరోపణలు వచ్చిన తరుణంలో ఈ పాటపై కోర్టును ఆశ్రయించింది. ఈ పిటిషన్‌పై విచారించిన కేరళ స్థానిక కోర్టు వరాహరూపం పాటపై స్టే విధించింది.
ఇక ఇప్పుడు పాలక్కాడ్ కోర్టు కూడా ఇదే విధమైన ఉత్తర్వులు జారీ చేసింది. తదుపరి ఉత్తర్వులు వచ్చేంత వరకు ఈ పాటను ఎక్కడా షేర్ చేయడం గానీ, ప్రసారం చేయడం గానీ కుదరదని పేర్కొంది.
అయితే "తైక్కుడం బ్రిడ్జ్" బ్యాండ్‌కు చెందిన వియాన్ ఫెర్నాండెజ్ ఇటీవలే తమకు క్రెడిట్ ఇస్తే ఈ పాటను ప్లే చేయడానికి ఇబ్బంది లేదని తేల్చేశారు. మరి ఈ వివాదంపై కాంతారా యూనిట్ ఎలాంటి నిర్ణయం తీసుకుంటుందనేది చర్చనీయాంశమైంది.
