జరీన్ ఖాన్.. బాలీవుడ్ హీరోయిన్. 'హేట్‌స్టోరీ-3', 'హౌజ్‌ఫుల్-2', 'వీర్' వంటి చిత్రాల్లో నటించింది. ఇపుడు ఈమె ఓ వ్యక్తి మరణానికి కారణమైంది. ఈ వివరాలను పరిశీలిస్తే, నార్త్‌గోవా బీజ్ విలేజ్‌లోని అంజ‌నా అనే ప్రాంతంలో ఓ వ్యక్తి బైక్‌పై వెళుతుండగా, వెనుక నుంచి వచ్చిన జరీన్ ఖాన్ కారు ఆ వ్యక్తి బైక్‌ని ఢీకొట్టింది.
ఈ ప్రమాదంలో ఆ వ్యక్తి డివైడ‌ర్‌ని ఢీకొన‌గా త‌ల‌కి తీవ్ర గాయ‌మైంది. వెంట‌నే జ‌రీన్‌ఖాన్, ఆమె అనుచరులు క్షతగాత్రుడుని తక్షణమే ఆస్పత్రికి తరలించారు. అయితే, త‌ల‌కి బ‌ల‌మైన గాయంకావ‌డంతో ఆయ‌న మృతి చెందిన‌ట్టు పోలీసులు తెలిపారు. ప్ర‌స్తుతం ఈ యాక్సిడెంట్‌కి సంబంధించి కేసు న‌మోదు చేసి విచారణ జరుపుతున్నారు.
కాగా, జరీన్ ఖాన్ హిందీతో పాటు ప‌లు త‌మిళ, పంజాబీ చిత్రాల‌లో కూడా నటించింది. ఈ మ‌ధ్య త‌న మాజీ మేనేజ‌ర్ త‌ప్పుగా ప్ర‌వ‌ర్తిస్తున్నాడ‌ని కేసు పెట్టి హాట్ టాపిక్‌గా నిలిచింది. ఫోన్ ద్వారా త‌ప్పుడు మేసేజ్‌లు కూడా పంపిస్తున్నాడంటూ త‌న ఫిర్యాదులో పేర్కొంది. ప్ర‌స్తుతం ఈ కేసు విచార‌ణ‌లో ఉంది.
