తెలుగు చిత్రపరిశ్రమకు చెందిన నందమూరి హీరో తారకరత్న గత నెలలో చనిపోయారు. గుండె సమస్యతో బాధపడుతూ వచ్చిన ఆయన కుప్పంలో తీవ్ర అస్వస్థతకు లోనై ఫిబ్రవరి 22వ తేదీన బెంగుళూరు ఆస్పత్రిలో చికిత్స పొందుతూ చనిపోయారు. ఆ తర్వాత తారకరత్న కుటుంబానికి హీరో నందమూరి బాలకృష్ణ పెద్ద దిక్కు అయ్యారు. అన్నీ తానై చూసుకుంటున్నారు. తారకరత్నపై తనకున్న ప్రేమకు గుర్తుగా తన ఆధ్వర్యంలో నడుస్తున్న బసవతారకం ఆస్పత్రిలోని ఒక వార్డుకు తారకరత్న పేరును పెట్టారు. దీనిపై తారకరత్న భార్య అలేఖ్యా రెడ్డి తీవ్ర భావోద్వేగానికి లోనయ్యారు. దీనిపై ఆమె తన ఇన్‌స్టాగ్రామ్ ఖాతాలో ఓ పోస్ట్ చేశారు.
"నేను ఏమి చెప్పగలను. మీకు నా కృతజ్ఞతలను ఎలా తెలియజేయగలను. మీ గురించి ఏది చెప్పినా తక్కువే అవుతుంది. బంగారు హృదయం కలిగిన గొప్ప వ్యక్తి అని చెప్పడం ఎంతమాత్రం ఆశ్చర్యం కాదు. మీకు ఎవరూ సాటికాదు. మీరు ఒక స్నేహితుడు, తండ్రి కంటే ఎక్కువ. ఇపుడు మీలో దేవుడుని చూసుకుంటున్నాను. మీ మంచితనాన్ని వర్ణించడానికి మాటలు సరిపోవడం లేదు. నా హృదయాంతరాల్లో నుంచి మీకు ధన్యవాదాలు చెబుతున్నాను. మీరు మమ్మల్ని ఎంత ప్రేమిస్తున్నారో.. అంతకంటే ఎక్కువగా మిమ్మల్ని మేం ప్రేమిస్తున్నాం. జై బాలయ్య" అంటూ ఎంతో భావోద్వేగతంగా ఆమె స్పందించారు. ఆ పోస్ట్ కింద అఖండ సినిమాలో అఘోరా రూపంలో ఉన్న బాలయ్య ఫోటోను షేర్ చేశారు.
