తెలంగాణ రాష్ట్రంలోని మారేడుపల్లి పోలీస్ స్టేషన్ పరిధికి చెందిన ఓ వ్యక్తి తన స్నేహితుడి భార్యతో లేచిపోయాడు. పైగా, తన భార్యకు లేఖ రాసిపెట్టి మరీ వెళ్లిపోయాడు. తాను తన స్నేహితుడి భార్యతో వెళ్లిపోతున్నానని, అందువల్ల తన కోసం ఎవరూ గాలించవద్దంటూ ఆ లేఖలో పేర్కొన్నాడు.
తాజాగా వెలుగులోకి వచ్చిన ఈ ఘటన వివరాలను పరిశీలిస్తే, న్యూబోయిన్‌పల్లికి చెందిన అతుల్ (45) అనే వ్యక్తి ఓ వ్యాపారి. ఈయన వివాహమై భార్య కూడా ఉంది. ఈ క్రమంలో తన స్నేహితుడి భార్యపై మనసు పారేసుకున్నాడు. కాలక్రమంలో వారిద్దరి మధ్య విడదీయలేని బంధంగా మారిపోయింది. దీంతో ఆమెతో కలిసి వెళ్లిపోయాడు.
దీనిపై అతుల్ భార్య ఇచ్చిన ఫిర్యాదు మేరకు మారేడుపల్లి ఎస్ఐ మోహన్ కేసు నమోదు చేసి విచారణ చేపట్టారు. ఈ విచారణలో తన భార్యకు అతుల్ రాసిన ఓ లేఖ బయటపడింది. ఇందులో ఈ నెల 29వ తేదీన తాను షిర్డీ వెళుతున్నట్టు పేర్కొన్నాడు. ఆ మరుసటి రోజు నుంచి అతుల్ ఫోన్ స్విచాఫ్ అయింది.
ఈ క్రమంలో అతని ఇంట్లో గాలించగా, సొంత భార్యకు రాసిన లేఖ లభ్యమైంది. అందులో తన స్నేహితుడి భార్యతో కలిసి ఉండటానికి వెళ్తున్నాని, ఈ విషయం తన స్నేహితుడికి తెలుసని, తమను వెతకవద్దని ఆ లేఖలో ఉందని ఎస్ఐ చెప్పాడు. కాగా, తన భర్త రూ.10 లక్షల నగదును తీసుకెళ్లాడని అతని భార్య పోలీసులకు చెప్పింది.
