తెల్లవారితే పెళ్లి.. అక్క భర్తతో లేచిపోయిన వధువు.. ఎక్కడ?

తెల్లవారితే పెళ్లి ముహూర్తం. ఇంతలో పెళ్లింట వధువు కనిపించలేదు. దీనిపై ఆరా తీయగా ఆమె.. తన అక్క భర్తతో లేచిపోయింది. ఈ విషయం తెలుసుకున్న వధువు, వరుడు కుటుంబ సభ్యులు అవాక్కయ్యారు. ఈ ఘటన తెలంగాణ రాష్ట్రంలోని జగిత్యాల జిల్లా గ్రామీణ మండలం కన్నాపూర్ గ్రామంలో జరిగింది. 

తాజాగా వెలుగులోకి వచ్చిన ఈ వివరాలను పరిశీలిస్తే, ఈ గ్రామానికి చెందిన 20 యేళ్ల యువతికి మల్యాల మండలం లంబడిపల్లి గ్రామానికి చెందిన ఓ వ్యక్తితో ఇరు కుటుంబ సభ్యులు పెళ్లి నిశ్చయించారు. పెద్దలు కుదిర్చిన ముహూర్తం ప్రకారం ఆదివారం ఉదయం 11 గంటలకు వివాహ వేడుక జరగాల్సివుంది. ఈ వివాహాన్ని వధువు ఇంటివద్దే చేయాలని నిర్ణయించడంతో అందుకు తగిన విధంగా ఏర్పాట్లుచేశారు. తెల్లారితే ముహూర్తం జరగాల్సివుంది. ఇంతలో వధువు ఇంట్లో కనిపించలేదు. వధువు కోసం గాలింపు చర్యలు చేపట్టారు. ఆ తర్వాత వారికి అసలు విషయం తెల్సింది. 

పెళ్లిపీటలపై కూర్చోవలసిన యువతి కాస్త.. తన అక్క భర్తతో లేచిపోయింది. మరికొన్ని గంటల్లో పెళ్లి కావాల్సిన తన చెల్లిని కట్టుకున్న భర్త ప్రేమ పేరుతో తీసుకెళ్లడంతో ఆ మహిళ బోరున విలపిస్తుంది. తన భర్త, చెల్లి మధ్య సాగిన ప్రేమ వ్యవహారాన్ని గుర్తించలేకపోవడం తనదే తప్పు అని చెబుతోంది. చివరకు ఈ వివాహం రద్దు కావడంతో ఇరు కుటుంబాల్లో విషాదం నెలకొంది.