హైదరాబాద్ నగరంలో పెను ప్రమాదం తప్పింది. సాగర్ రింగ్ రోడ్డు కూడలిలో చేపట్టిన ఫ్లైఓవర్ నిర్మాణ పనుల్లో ప్రమాదం జరిగింది. పిల్లర్ల మధ్య ఇనుప ర్యాంప్ ఏర్పాటు చేస్తుండగా అది ఒక్కసారిగా కూలిపోయింది. ఈ ఘటనలో 9 మంది కార్మికులకు గాయాలు కాగా.. వారిలో ఒకరి పరిస్థితి విషమంగా ఉంది.
రెడీ మిక్సర్ తయారు చేసే లారీ రివర్స్ తీసుకునే సమయంలో ఈ ప్రమాదం జరిగింది. బైరామల్ గూడూ వైపు నుంచి ఫ్లైఓవర్ పైకి వెహికిల్స్ ఎక్కే ర్యాంప్ కుప్పకూలిపోవడంతో ఈ ప్రమాదం జరిగింది. ఇందులో గాయపడిన కార్మికులంతా బిహార్‌కు చెందిన వారు.
క్షతగాత్రులను ఆస్పత్రికి తరలించారు. ఘటనాస్థలానికి ఎల్బీనగర్‌ ఎమ్మెల్యే సుధీర్‌ రెడ్డి, జీహెచ్‌ఎంసీ మేజర్‌ ప్రాజెక్టు అధికారులు చేరుకుని పరిశీలించారు. పొక్లెయిన్‌ సాయంతో శిధిలాలను తొలగిస్తున్నారు. ఈ ప్రమాదం కారణంగా నిర్మాణ పనులను తాత్కాలికంగా నిలిపివేశారు.
