తెలంగాణ రాష్ట్ర ముఖ్యమంత్రి కేసీఆర్ మరో చారిత్రాత్మక నిర్ణయం తీసుకున్నారు. వ్యాపారాల్లో బీసీ, ఎస్సీ, ఎస్టీలకు అవకాశం ఇవ్వాలనే మద్యం షాపుల కేటాయింపుల్లో రిజర్వేషన్ విధానాన్ని తీసుకువచ్చారు. ఈ విషయాన్ని రాష్ట్ర మంత్రి శ్రీనివాస్ గౌడ్ తెలిపారు.
దేశంలో ఎక్కడా లేనివిధంగా వైన్ షాపుల కేటాయింపుల్లో రిజర్వేషన్లు కల్పించి సీఎం కేసీఆర్ చారిత్రాత్మక నిర్ణయం తీసుకున్నారన్నారు. సోమవారం కలెక్టర్ కార్యాలయంలో మద్యం షాపుల రిజర్వేషన్ కేటాయింపు డ్రా కార్యక్రమంలో మంత్రి పాల్గొన్నారు.
ఈ సందర్భంగా మంత్రి శ్రీనివాస్ మాట్లాడుతూ.. రాష్ట్రంలో 2620 షాపులకిగాను 756 షాపులకి రిజర్వేషన్లు కల్పించామన్నారు. వాటిలో 363 షాపులు గౌడ్లకు.. 262 ఎస్సీలకు 131 ఎస్టీలకు రిజర్వేషన్ల ప్రాతిపదికన కేటాయించామన్నారు. అప్లికేషన్, లైసెన్స్ ఫీ పెంచలేదని, నామమాత్రంగా షాపుల సంఖ్యను పెంచామని చెప్పారు.
ఒక మనిషి.. ఒకే షాప్ అనే నిబంధన తీసివేశామన్నారు. రాష్ట్రంలో గుడంబా, గంజాయి, మత్తుపదార్థాల విక్రయాలపై ఉక్కుపాదం మోపుతామని, ఎలాంటి వారిపైనైనా పీడీ కేసులు పెడతామని హెచ్చరించారు. కల్తీ మద్యం లేకుండా చూస్తామన్నారు.
భవిష్యత్‌లో కాంట్రాక్టులు, మెడికల్ షాపుల కేటాయింపుల్లో కూడా రిజర్వేషన్‌ను అమలు చేసే అంశం పరిశీలనలో ఉందని మంత్రి శ్రీనివాస్ గౌడ్ తెలిపారు. అన్ని కులాల సంక్షేమం కోసం తెలంగాణ ప్రభుత్వం కృషి చేస్తోందని, ఈ సందర్భంగా సీఎం కేసీఆర్ కృతజ్ఞతలు తెలిపారు.
