హైదరాబాద్ నగరంలోని పలు ప్రాంతాల్లో శుక్రవారం తెల్లవారుజాము నుంచి భారీ వర్షం కురుస్తుంది. భారీగా ఈదురు గాలులు వీయడంతో అనేక ప్రాంతాల్లో చెట్లు కూలిపోయాయి. మరికొన్ని ప్రాంతాల్లో విద్యుత్ స్తంభాలు విరిగిపడ్డాయి. దీంతో విద్యుత్ సరఫరాకు అంతరాయం ఏర్పడింది. ఈ నెల 16వ తేదీ వరకు ఇదే పరిస్థితి కొనసాగుతుందని హైదరాబాద్ ప్రాంతీయ వాతావరణ కేంద్రం తెలిపింది.
నగరంలో శుక్రవారం తెల్లవారుజాము నుంచి ఉరుములు, మెరుపులతో కూడిన వర్షం కురుస్తుంది. పలు ప్రాంతాల్లో భారీ వర్షం పడుతుంది. బంజారాహిల్స్, జూబ్లీహిల్స్, ఫిల్మ్ నగర్, పంజాగుట్ట, ఖైరతాబాద్, లక్డీకాపూల్, నాంపల్లి, చందానగర్, మియాపూర్, కూకట్‌పల్లి, అల్వాల్, బోయిన్ పల్లి, మణికొండ, టోలీచౌకి, అత్తాపూర్, రాజేంద్ర నగర్, సికింద్రాబాద్, మాదాపూర్‌లో వర్షం కురుస్తుంది. ఈదురు గాలులు ధాటికి పలు ప్రాంతాల్లో చెట్లు కూలిపోయాయి. విద్యుత్ సరఫరాకు అంతరాయం ఏర్పడింది. అనేక లోతట్టు ప్రాంతాల్లో నీళ్లు నిలిచిపోయాయి.
గ్రేటర్ హైదరాబాద్ మున్సిపల్ కార్పొరేషన్‌ సిబ్బంది రోడ్లపై నీళ్లు నిలువకుండా తగిన జాగ్రత్తలు తీసుకుంటున్నారు. కొన్నాళ్లుగా ఎండతో పాటు పగటిపూట ఉష్ణోగ్రతలు విపరీతంగా పెరిగిపోయాయి. ఈ నేపథ్యంలో శుక్రవారం తెల్లవారుజాము నుంచి కురుస్తున్న వర్షంతో వాతావరణం కాస్త చల్లబడే అవకాశం ఉంది. ఈ వర్షాలు హైదరాబాద్ నగరంతో పాటు పలు ప్రాంతాల్లో ఈ నెల 16వ తేదీ వరకు కొనసాగుతుందని వాతావరణ కేంద్రం తెలిపింది.
