హైడ్రాను మంచి ఉద్దేశంతో ఏర్పాటు చేసి ఉండే బాగుండేదని... కానీ అదో బ్లాక్మెయిల్ దుకాణం అని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. తెలంగాణ గురించి అవగాహన లేనివారు... పరిశ్రమల గురించి అవగాహన లేనివారు నడుపుతున్నట్లుగా హైడ్రా ఉందని మండిపడ్డారు.
హైడ్రా కారణంగా ఈ రోజు ఎవరైనా లేక్ వ్యూ అని పేరు పెట్టాలనుకున్నా భయపడుతున్నారన్నారు. బెదిరింపుల కారణంగా మార్కెట్ మొత్తం ఆగం అవుతోందని ఆందోళన వ్యక్తం చేశారు. వారి పిచ్చి నిర్ణయాలతో రియల్ ఎస్టేట్ పడిపోతోందని.. మార్కెట్‌ను నాశనం చేశారని విమర్శించారు.
హైదరాబాదులో తెలంగాణ రియల్టర్స్ ఫోరమ్ సమావేశంలో కేటీఆర్ మాట్లాడుతూ.. హైడ్రాపై తీవ్రస్థాయిలో విరుచుకుపడ్డారు. ముఖ్యమంత్రి రేవంత్ రెడ్డి తన కుర్చీని కాపాడుకోవడానికి ఢిల్లీకి డబ్బులు పంపించాలని... పంపకుంటే ఢిల్లీ పెద్దలు ఊరుకోరని విమర్శించారు.
ప్రజలను ఆర్థికంగా, మానసికంగా ఇబ్బందులకు గురిచేసిన హైడ్రా కూల్చివేతలకు బాధ్యులెవరో చెప్పాలని కేటీఆర్ డిమాండ్‌ చేశారు. "హైడ్రా ప్రస్తావన ప్రజల వెన్నులో వణుకు పుట్టిస్తుంది. బిల్డర్లు తమ ప్రాజెక్టులకు లేక్ వ్యూ అని పేరు పెట్టడానికి భయపడుతున్నారు. ఇది రియల్టర్లకు గుదిబండగా మారింది' అని కేటీఆర్ అన్నారు. రాష్ట్రాభివృద్ధి కంటే, ముఖ్యమంత్రి తన ఢిల్లీ ఉన్నతాధికారులకు నిధులు పంపి తన పదవిని కాపాడుకోవడంలో బిజీగా ఉన్నారని అన్నారు.
దశాబ్ద కాలం నాటి బీఆర్ఎస్ పాలనను గుర్తుచేస్తూ రైతులు, భూ యజమానులు, డెవలపర్లు వృద్ధి, స్థిరత్వాన్ని అనుభవించారన్నారు. 2014కి ముందు రాష్ట్రంలో భూమి విలువ చాలా తక్కువగా ఉందని, నీటిపారుదల కొరత ఉందని ఆయన పేర్కొన్నారు. కానీ కె చంద్రశేఖర్ రావు హయాంలో, బీఆర్ఎస్ ప్రభుత్వం నిరంతర విద్యుత్ సరఫరాను అందించడమే కాకుండా, సంపద సృష్టికి దారితీసిన నీటిపారుదల ప్రాజెక్టులతో రాష్ట్ర మౌలిక సదుపాయాలను కూడా మార్చింది. తెలంగాణ మనుగడ, సుస్థిరతపై ప్రజలు సందేహాలు లేవనెత్తారని, అయితే కేసీఆర్ వాటినన్నింటినీ బ్రేక్ చేశారని గుర్తు చేశారు.
చంద్రశేఖర్‌రావు హయాంలో బీఆర్ఎస్ విధానాలు అభివృద్ధి, ప్రగతి లక్ష్యంగా ఉన్నాయని, అలాంటి బ్లాక్మెయిల్ వ్యూహాలు కాదని పునరుద్ఘాటించారు. దీనికి పూర్తి విరుద్ధంగా, కాంగ్రెస్ ప్రభుత్వం హైడ్రా చర్యల ద్వారా ప్రజలను లక్ష్యంగా చేసుకుంటోందని, ఇది తెలంగాణ రియల్ ఎస్టేట్ రంగాన్ని అస్థిరపరిచి పెట్టుబడిదారుల విశ్వాసాన్ని దెబ్బతీస్తోందని కేటీఆర్ ఆయన విమర్శించారు.
