భారత ఉపరాష్ట్రపతి వెంకయ్య నాయుడుకి మైక్రోబ్లాగింగ్ సంస్థ ట్విట్టర్ షాకిచ్చింది. ఉపరాష్ట్రపతి వెంకయ్యనాయుడు వ్య‌క్తిగ‌త అకౌంట్ నుంచి బ్లూ టిక్ లేదా వెరిఫైడ్ బ్యాడ్జ్‌ను తొల‌గిస్తూ అనూహ్య నిర్ణయం తీసుకుంది. దీనికి కారణాన్ని కూడా తెలిపింది. గత ఆరు నెల‌లకుపైగా ఈ అకౌంట్ (@MVenkaiahNaidu) ఇన్‌యాక్టివ్‌గా ఉండ‌టం వ‌ల్లే ట్విట‌ర్ ఈ నిర్ణయం తీసుకున్న‌ట్టు పేర్కొంది. ఈ విషయాన్ని ప్ర‌ముఖ న్యూస్ ఏజెన్సీ ఏఎన్ఐ వెల్ల‌డించింది.
అయితే, ఉపరాష్ట్రపతి అధికారిక అకౌంట్ @VPSecretariatకు మాత్రం బ్లూటిక్ అలాగే ఉంది. అయితే ఆయ‌న వ్య‌క్తిగ‌త అకౌంట్‌కు వెరిఫైడ్ స్టేట‌స్ తీసేయ‌డంపై అభ్యంత‌రం వ్య‌క్తం చేయ‌డంతో ట్విట్టర్ తిరిగి బ్లూటిక్ ఇవ్వ‌నున్న‌ట్లు ఉపరాష్ట్రపతి కార్యాల‌యం వెల్ల‌డించింది.
ఈ అకౌంట్ నుంచి వెంకయ్యనాయుడు చివ‌రిసారి 2020, జులై 23న ట్వీట్ చేశారు. ట్విట్టర్ ఇచ్చే ఈ బ్లూటిక్ లేదా వెరిఫైడ్ బ్యాడ్జ్ వ‌ల్ల ఇది అధికారిక, గుర్తింపు పొందిన, యాక్టివ్‌గా ఉన్న అకౌంట్‌గా ధృవీక‌రించుకోవ‌చ్చు. ప్ర‌ముఖ వ్య‌క్తులు, బ్రాండ్ల‌కు మాత్రమే ట్విట‌ర్ ఈ గుర్తింపు ఇస్తుంది.
