సాధారణంగా క్రూర జంతువుల కంట పడితో బతికిబట్టకట్టడం అసాధ్యం. అలాంటిది.. ఓ పులి చేతిలో చిక్కి చివరకు ప్రాణాలతో బయటపడటం అంటే.. ఇంతకుముంచిన అదృష్టం మరొకటి ఉండదు. ఇలాంటి సంఘటన నిజంగానే జరిగింది. ఓ వ్యక్తిపై పులి పంజాతో కొట్టినంతపనిచేసి.. అతని కాలిపిక్కను కూడా పట్టుకుంది. కానీ, ఎందుకనే.. ఆ వ్యక్తిని చంపకుండా పులి వెనుదిరిగి వెళ్లిపోయింది.
దీంతో బతుకుజీవుడా అంటూ ఆ వ్యక్తి ప్రాణాలతో బయటపడి బిత్తర చూపులు చూస్తూ నడుచుకుంటూ వెళ్లాడు. ఇది ఏ సినిమాలోనో కనిపించిన దృశ్యం కాదు. నిజంగానే జరిగింది. ఈశాన్య రాష్ట్రమైన అస్సాంలోని తేజ్‌పూర్ అటవీ ప్రాంతంలోని వ్యవసాయ క్షేత్రాల్లోకి ఓ రాయల్ బెంగాల్ టైగర్ ఒకటి వచ్చింది. ఇది స్థానికులను భయాందోళనలకు గురిచేసింది. ఈ పెద్దపులి కంటపడిన ఓ వ్యక్తి అదృష్టవశాత్తు బతికిబయటపడ్డాడు.
తేజ్‌పూర్ సమీపంలోని వ్యవసాయ క్షేత్రాల్లోకి వచ్చిన పెద్దపులి స్థానికులను భయాందోళనలకు గురిచేసింది. వారిపై దాడికి యత్నించడంతో రైతులు ప్రాణాలను అరచేతిలో పట్టుకుని తలో దిక్కుకు పరుగులు తీశారు. వారిలో ఓ రైతును పులి వెంటతరమడమే కాదు పంజాతో కొట్టిచంపినంత పనిచేసింది.
పులి వెంటపడటంతో దిక్కుతోచని ఆ రైతు... పరుగులు తీస్తూ ఓ గోతిలో దూకేశాడు. పులి కూడా అమాంతం అతనితో పాటే గోతిలోకి దూకేసింది. అయితే ఎందుకనో వెంటనే వెనక్కి వచ్చేసి ఇసుక దిబ్బలనెక్కి సమీపంలోని చెట్లలోకి మాయమైంది. ఈ ఘటన తాలూకు వీడియోను భారత అటవీశాఖ అధికారులు ట్విట్టర్‌లో షేర్ చేయగా, అది వైరల్ అయింది. అయితే, ఈ పులిదాడిలో ఇద్దరు గాయపడ్డారు.
