కంటికి రెప్పలా కాపాడాల్సిన తండ్రే కన్నకూతురి పాలిట కామపిశాచిగా మారాడు. ఎదిగిన కూతురిపై కన్నేసిన ఓ దుర్మార్గపు తండ్రి, ఏడాది కాలంగా ఆమెపై తన వికృత చేష్టలతో దారుణానికి ఒడిగట్టాడు. ఈ విషయం తెలుసుకున్న బాబాయి కూడా ఆమెను బెదిరించి బలవంతంగా తన కోరికను తీర్చుకున్నాడు. కర్ణాటకలో జరిగిన ఈ సంఘటన సర్వత్రా చర్చనీయాంశంగా మారింది.
17 ఏళ్ల యువతి వరుసకు బాబాయ్ అయ్యేటువంటి వ్యక్తి ఇంటికి వెళ్లింది. ఆ బాలికపై అతనికి కన్ను పడింది. ఆమెను ఎలాగైనా ఆ రాత్రి అక్కడే ఉంచేందుకు ప్లాన్ వేశాడు. తనలో ఉన్న రాక్షసత్వాన్ని బయటపెట్టాడు. ఆమెను బెదిరించి బలవంతంగా అత్యాచారం చేసాడు. అతని వికృత చేష్టలకు తట్టుకోలేని బాధితురాలు ఈ విషయాన్ని తన తల్లికి తెలిపింది. దీంతో బాధితురాలి తల్లి పోలీసులకు ఫిర్యాదు చేసింది. ఈ ఘటనపై పోలీసులు కేసు నమోదు చేసి, నిందితులను అదుపులోకి తీసుకున్నారు.
అయితే పోలీసుల విచారణలో షాకింగ్ విషయం బయటపడింది. సదరు యువతిపై ఆమె తండ్రే ఏడాది కాలంగా అఘాయిత్యానికి పాల్పడుతున్నాడని నిందితుడు పోలీసులకు వివరించాడు. ఆ విషయం తెలిసే.. తాను కూడా ఆమెపై లైంగిక దాడి చేసినట్లు నిందితుడు వివరించాడు. ఇదే విషయాన్ని బాధితురాలు కూడా అంగీకరించింది. తన తండ్రి కూడా ఏడాదికాలంగా ఇదే విధంగా ప్రవర్తిస్తున్నాడని ఆమె తల్లి ముందు బోరున ఏడ్చింది. ఈ ఘటనపై విచారణ జరిపిన పోలీసులు పరారీలో ఉన్న ఆమె తండ్రి కోసం గాలిస్తున్నారు.
