పాకిస్థాన్‌కు తామెందుకు సాయం చేయాలని అమెరికా అధ్యక్షుడు డొనాల్డ్ ట్రంప్ ప్రశ్నించారు. పాకిస్థాన్ వల్ల తమకు ఒరిగేదేమీ లేదని ట్రంప్ వ్యాఖ్యానించారు. పాకిస్థాన్ వంటి దేశానికి అమెరికా ప్రతీ ఏడాది 1.3 బిలియన్ డాలర్లు సహాయం చేస్తోంది.
అయినా తమకు వారి వల్ల ఒరిగేదేమీ ఉండటం లేదని.. పైగా లాడెన్ లాంటి వ్యక్తికి తమ భూభాగంలో చోటు ఇచ్చి తమకు సమాచారం కూడా ఇవ్వలేదని ట్రంప్ వ్యాఖ్యానించారు. ఇలాంటి విషయాలను బట్టి ఆలోచిస్తే.. తమకు పాకిస్థాన్‌కి సహాయం చేయడం సముచితం కాదని అనిపిస్తున్నట్లు తెలిపారు.
అందుకే పాకిస్థాన్‌కు అందించే సాయాన్ని ఇవ్వకూడదని భావించినట్లు ట్రంప్ చెప్పారు. అమెరికా పాకిస్థాన్ నుంచి ఏమి ఆశించి.. గత 15 ఏళ్లుగా ఆర్థిక సాయం చేస్తుందో తనకు అర్థం కావట్లేదన్నారు. ఇప్పటి వరకు అమెరికా 33 బిలియన్ డాలర్లను పాకిస్థాన్‌కు సహాయంగా ఇచ్చిందని.. అయినా పాకిస్థాన్ అబద్ధాల కోరుగా వ్యవహరించిందని.. లాడెన్ జాడ తెలిసి కూడ చెప్పలేదని ట్రంప్ అన్నారు.
పాకిస్థాన్ సర్కార్ ఏమనుకుంటోంది... అమెరికా నాయకులు చేతకాని వారనుకుంటుందా.. తమ సైనికులు ఉగ్రవాదుల వేట కోసం ఆప్ఘనిస్థాన్లో పడికాపులు పడుతుంటే.. లాడెన్ జాడ తెలిసి కూడా వారు చెప్పలేదని.. ఇంత నమ్మకద్రోహం చేసిన దేశానికి, అమెరికా ఎందుకు సహాయం చేయాలని.. అందుకే ఈ ప్రతిపాదనకు విముఖత చూపానని గతంలో కూడా ట్రంప్ ట్వీట్ చేశారు.
