సాధారణంగా మద్యం సేవించి వాహనాలు నడిపేవాళ్లలో చాలా మంది డ్రంక్ అండ్ డ్రైవ్ కేసుల్లో పోలీసులకు అడ్డంగా దొరికిపోతుంటారు. మందు చూస్తే కాస్త కూడా తట్టుకోలేరు. డ్రైవింగ్ చేయాలన్న విషయాన్ని కూడా మరిచిపోయి ఫుల్లుగా మద్యాన్ని లాగించేస్తారు.
తాగడం పూర్తయ్యక కానీ డ్రైవింగ్ చేయాలన్న విషయం గుర్తుకు రాదు. ఆ సమయంలో చేసేదేమీ లేక ఎలాగోలా డ్రైవింగ్ చేస్తూ ఇంటికి వెళ్లిపోదాం అనుకుంటారు. అయితే కర్మ కొద్దీ పోలీసులు వాళ్ల వాహనం ఆపితే అంతే సంగతులు.
ఇలాగే అమెరికాలోని సౌత్ కరోలినాకు చెందిన ఓ వ్యక్తి ఫుల్లుగా మద్యం తాగి తన వాహనంలో వెళ్తున్నాడు. ఇంతలోనే తన వాహనాన్ని ట్రాఫిక్ పోలీసులు ఆపుతున్నట్టు అనిపించింది. అంతే వేంటనే ఆలస్యం చేయకుండా తన దగ్గర ఉన్న ఏక్స్ పర్‌ఫ్యూమ్‌ను తన నోట్లో స్ప్రే చేసుకున్నాడు. తాగిన వాసన పోలీసులకు రావద్దనుకున్నాడో ఏమో గానీ వెంటనే స్ప్రేను నోట్లో కొట్టుకున్నాడు.
స్ప్రే అయితే నోట్లో కొట్టుకున్నాడు సరే..అయినప్పటికీ మనోడు అడ్డంగా దొరికిపోయాడు. పోలీసులు అతడి వాహనంలో 12 బీర్లను స్వాధీనం చేసుకోవడంతో పాటు 10 ఖాళీ బీర్ల టిన్‌లను గుర్తించారు. అంతేకాకుండా సదరు వ్యక్తి కారు నడుపుతూనే ఓ బీరు సీసాను తన కాళ్ల మధ్యలో పెట్టుకొని ఉన్నాడు.
అతడికి డ్రంక్ అండ్ డ్రైవ్ టెస్ట్ నిర్వహించడంతో అతడు ఫుల్లుగా మద్యం తాగినట్లు తేలింది. ఆ వ్యక్తి నోట్లో స్ప్రే కొట్టుకున్నప్పటికీ.. పోలీసుల బారి నుంచి తప్పించుకోలేకపోయాడు. పోలీసులు వెంటనే అతడిని కస్టడీలోకి తీసుకొని విచారిస్తున్నారు.
