క్లాస్ టీచర్ ఇచ్చిన హోం వర్క్ చేయడంలో ఓ చిన్నారి చూపిన విజ్ఞతకు నెటిజన్లు ఫిదా అయిపోయారు. ఆమె వయసులో చిన్నదే అయినప్పటికీ... కానీ ఆలోచనలో మాత్రం ఎన్నోరెట్లు పెద్దదని తన చేతలతో నిరూపించింది. ఆమె చేసిన కామెంట్స్ ఇపుడు సోషల్ మీడియాలో వైరల్ అయ్యాయి. ఇంతకీ ఆ చిన్నారి చేసిన వ్యాఖ్యలు ఏంటో, ఆమె వివరాలు ఏంటో తెలుసుకుందాం.
అమెరికా, వాషింగ్టన్‌లోని ముర్రేలోని గ్రాంట్‌ ఎలిమెంటరీ స్కూల్లో రిథమ్ పచేకో అనే చిన్నారి నాలుగో తరగతి చదువుతోంది. ఆమెకు క్లాస్ టీచర్ ఓ హోం వర్క్ ఇచ్చింది. అదీ కూడా ఓ లెక్క రూపంలో. ఓ పట్టికలో నలుగురు నాల్గవ తరగతి విద్యార్థినిల బరువులు ఇచ్చి వారిలో తక్కువ బరువున్న విద్యార్థిని కంటే ఇసాబెల్‌ ఎంత ఎక్కువ బరువుందో కనుక్కొమంది.
అయితే ఈ లెక్క పచేకోకు ఏమాత్రం నచ్చలేదు. దాంతో వర్క్‌బుక్‌ మీద తాను ఈ లెక్కను చేయలేనని నిక్కచ్చిగా చెప్పింది. అలా పేర్కొనడానికి గల కారణాన్ని కూడా వెల్లడించింది. పచేకో తన నోట్స్‌లో 'ఏంటిది.. ఇది వారిని చాలా బాధపెడుతుంది. నేను ఇంత కఠినంగా ఉండాలనుకోవడం లేదు. ఈ లెక్కను నేను చేయడం లేదు. మీరిచ్చిన సమస్య చాలా బాగుంది. కానీ ఓ మనిషి మిగతా వారి కంటే ఎంత ఎక్కువ బరువుందో కనుక్కొమనడం నాకు నచ్చలేదు. అందుకే మీరిచ్చిన హోం వర్క్‌ను నేను చేయడం లేదు' అని తెలిపింది.
మ్యాథ్స్‌ టీచర్ కూడా ఆ చిన్నారి చూపిన విజ్ఞతకు సంతోషించింది. వెంటనే దీన్ని సోషల్ మీడియాలో షేర్‌ చేసింది. దాంతో నెటిజన్లు కూడా పచేకో చేసిన పనిని అభినందిస్తున్నారు. అంతేకాక ఇలాంటి తలకు మాసిన సిలబస్‌ను తయారు చేసిన అధికారులను విమర్శిస్తున్నారు.
