తను ఓ తెలివితక్కువ వాడిననీ, ఫూల్‌ననీ పాకిస్తాన్ ప్రధానమంత్రి అన్నారు. ఈ మాట ఎందుకు అన్నారంటే.... ఆయనపై అవినీతి, అక్రమ సంపాదన కేసు నమోదైంది. ఈ కేసు విచారణలో భాగంగా ఆయన కోర్టుకు హాజరయ్యారు. అవినీతి, అక్రమ సంపాదన గురించి కోర్టు ప్రశ్నించినప్పుడు ఆయన ఇలా స్పందించారు.
ఈ కేసుపై ఆయన కోర్టు అనుమతి తీసుకుని మాట్లాడుతూ.. నేను దేవుడు దయవల్ల పాకిస్తాన్ దేశానికి ప్రధానమంత్రి అయ్యాను. ఐతే పంజాబ్ ముఖ్యమంత్రిగా వున్న పన్నెండున్నరేళ్ల కాలంలో కనీసం జీతం కూడా తీసుకోకుండా పనిచేసాను. నిజంగా నేను ఓ తెలివితక్కువ వాడిని, ఎంతమాత్రం జీతం తీసుకోకుండా ఎవరైనా పనిచేస్తారా అంటూ చెప్పారు.
తను ముఖ్యమంత్రిగా వున్న సమయంలో సెక్రటరీ తమకు ప్రయోజనం చేకూర్చే నోట్ పంపినా దానిని తిరస్కరించాననీ, అందువల్ల తమ కుటుంబం 2 బిలియన్ల పాకిస్తానీ రూపీలు నష్టపోయినట్లు చెప్పారు. కాగా పదవీచ్యుతుడైన మాజీ ప్రధాని ఇమ్రాన్ ఖాన్ మాత్రం షెహబాజ్ పైన ఆరోపణలు గుప్పిస్తున్నారు. వేలకోట్లు కొల్లగొట్టిన అవినీతిపరుడు పాకిస్తాన్ ప్రధానిగా అనర్హుడు అంటూ ఆందోళనలు చేస్తున్నారు.
