మామిడి పులిహోర.. ఎలా చేయాలో తెలుసా?

సాధారణంగా మనం చింతపండు, నిమ్మకాయలతో పులిహోర చేసుకుంటూ ఉంటాం. కేవలం ఇవే కాకుండా మామిడి తురుముతో కూడా పులిహోర తయారుచేసుకోవచ్చు. ఇది తినటానికి రుచిగా మాత్రమే కాకుండా ఆరోగ్యపరంగా కూడా ఎంతో మేలు చేస్తుంది. దీనిలో సి విటమిన్

పుష్కలంగా ఉంటుంది. ఇప్పుడు దీనిని ఎలా తయారుచేసుకోవాలో చూద్దాం.

కావలసిన పదార్ధాలు...

బియ్యం- పావుకిలో

మామిడికాయ తురుము- కప్పు

పసుపు- పావు టీ స్పూను

ఉప్పు- తగినంత

నూనె -2 టేబుల్ స్పూన్లు

ఆవాలు- టీ స్పూన్

శెనగపప్పు- టేబుల్ స్పూన్

మినపప్పు- టేబుల్ స్పూన్

ఎండుమిర్చి- 4

ఇంగువ- చిటికెడు

పచ్చిమిర్చి-4

పల్లీలు- పావుకప్పు

కరివేపాకు- 2 రెబ్బలు

తయారుచేసే విధానం..

బియ్యం ఉడికించి ప్లేటులో ఆరనివ్వాలి. టీ స్పూన్ నూనెలో పసుపు వేసి కలపాలి. విడిగా ఓ బాణాలిలో నూనె వేసి శెనగపప్పు, మినపప్పు,ఎండుమిర్చి, పచ్చిమిర్చి, ఇంగువ, ఆవాలు వేసి వేయించి పోపు చేయాలి. అవి వేగాక పల్లీలు, పసుపు, ఉప్పు, కరివేపాకు వేసి బాగా వేగనివ్వాలి. అందులోనే మామిడికాయ తురుము వేసి కలిపి వెంటనే దించేసి అన్నం మిశ్రమంలో కలిపితే మామిడికాయ పులిహోర రెడీ.