మరో నెలరోజుల్లోనే పెళ్లి. ధూంధాంగా వస్తువులు, నగలు కొంటున్నారు. కాబోయే జంట తమకు ఇష్టమైన దుస్తులు కొనేందుకు వచ్చారు. షాపింగ్ ముగిసింది. ఇంటికి తిరుగుముఖం పట్టారు. మధ్యలో తను కట్టుకోబోయే భర్త పీక కోసి పరారైంది ఓ యువతి. ఏం జరిగింది?
ఏపీలోని అనకాపల్లి బుచ్చయ్యపల్లి పరిధిలోని కొమళ్లపూడిలో ఓ దారుణం చోటుచేసుకుంది. మాడుగుల మండలానికి చెందిన రామునాయుడికి, రావికమతం గ్రామానికి చెందిన పుష్పకి పెద్దలు వివాహ నిశ్చయం చేసారు. పెళ్లి వచ్చే నెల 20వ తేదీ జరగాల్సి వుంది. ఈ క్రమంలో కాబోయే భార్యాభర్తలు షాపింగ్ చేసేందుకు వడ్డాది వెళ్లారు. ముగించుకుని తిరుగు ప్రయాణమయ్యారు.
దారిమధ్యలో సాయిబాబా గుడి వుండటంతో అక్కడ కొద్దిసేపు విరామం తీసుకుని వెళ్దామని యువతి చెప్పింది. దానితో రామునాయుడు ఆ గుడివద్దకు ఆమెతో కలిసి వెళ్లాడు. ఇంతలో సరదాగా ఓ ఆట ఆడదామంటూ అతడి కళ్లకు గంతలు కట్టింది. అలా ఆడుతూనే తనతో తెచ్చుకున్న కత్తితో కాబోయే వాడి పీక కోసింది.
ఆ తర్వాత తనే బాధితుడ్ని తన ద్విచక్రవాహనంపై తీసుకుని వచ్చి సమీప ఆసుపత్రిలో చేర్పించి గొంతుకు ఏదో గుచ్చుకున్నదని చెప్పి అక్కడి నుంచి పరారైంది. ఆసుపత్రికి చేరుకున్న పోలీసులు కేసు నమోదు చోసి దర్యాప్తు చేస్తున్నారు.
