ప్రపంచ కప్ టోర్నీ నుంచి ఆప్ఘనిస్థాన్ నిష్క్రమించింది. అహ్మదాబాద్‌లోని నరేంద్ర మోదీ స్టేడియంలో జరిగిన పోరులో దక్షిణాఫ్రికా 5 వికెట్ల తేడాతో ఆఫ్ఘన్ జట్టుపై గెలిచింది. చివరి లీగ్ మ్యాచ్‌లో ఓటమితో ఆప్ఘన్ తట్టా బుట్టా సర్దేసింది.
ఆఫ్ఘన్ జట్టు నిర్దేశించిన 245 పరుగుల విజయలక్ష్యాన్ని సఫారీలు 47.3 ఓవర్లలో ఛేదించారు. వాన్ డర్ డుసెన్ 76 పరుగులతో అజేయంగా నిలిచి దక్షిణాఫ్రికా విజయంలో కీలకపాత్ర పోషించాడు.
ఈ మ్యాచ్‌లో దక్షిణాఫ్రికా వికెట్ కీపర్ క్వింటన్ డికాక్ అత్యధిక డిస్మిసల్స్‌తో వరల్డ్ కప్ రికార్డును సమం చేశాడు. ఒకే ఇన్నింగ్స్‌లో ఆరు క్యాచ్‌లు పట్టి... ఆడమ్ గిల్ క్రిస్ట్ (ఆస్ట్రేలియా), సర్ఫరాజ్ (పాకిస్థాన్)ల సరసన చేరాడు.
కాగా, శనివారం వరల్డ్ కప్‌లో ఆస్ట్రేలియా-బంగ్లాదేశ్, పాకిస్థాన్-ఇంగ్లండ్ మ్యాచ్‌లు జరగనున్నాయి. ఆదివారం టీమిండియా, నెదర్లాండ్స్‌తో ఆడనుంది. పాయింట్ల పట్టికలో తొలి స్థానంలో ఉన్న భారత జట్టు నాలుగో స్థానంలో నిలిచే జట్టుతో తొలి సెమీఫైనల్లో తలపడుతుంది.
