భారత క్రికెట్ జట్టు మాజీ కెప్టెన్ మహేంద్ర సింగ్‌పై యువ క్రికెటర్ రిషభ్ పంత్ ప్రశంసల వర్షం కురిపంచారు. ధోనీ దేశానికి హీరో అని, అతన్ని రీప్లేస్ చేయడం చాలా కష్టమన్నాడు. కొందరికి దేశ వ్యాప్తంగా అభిమానులు ఉంటారని అలాంటి వ్యక్తి ధోనీ అని, అతను ఉన్న భారత జట్టులో తాను కూడా సభ్యుడు కావడం మరింత గౌరవంగా భావిస్తున్నట్టు చెప్పారు.
టీమిండియా మాజీ కెప్టెన్ ఎంఎస్ ధోనీకి ప్రపంచవ్యాప్తంగా ఫ్యాన్స్ ఉంటారు. అలాంటి వ్యక్తికి భారత జట్టులో అతడితో కలిసి ఆడినవారు మరింత గౌరవం ఇస్తారు. ధోనీ తమ మార్గదర్శి అని గర్వంగా చెప్పే క్రికెటర్లూ ఉన్నారు. వారిలో టీమ్స్ఇండియా యువ వికెట్ కీపర్ రిషబ్ పంత్ ముందుంటాడు. భారత జట్టుకు రెండుసార్లు ప్రపంచ కప్‌ను అందించిన సారథిగా ధోనీ చిరస్థాయిగా నిలిచిపోతాడని ప్రశంసలు కురిపించాడు. ధోనీని రీప్లేస్ చేయడం చాలా కష్టమని.. ఆ దిశగా తాను సాగుతానని వెల్లడించాడు.
'ధోనీ దేశానికి హీరో. వ్యక్తిగతంగా, క్రికెటర్ అతడి నుంచి ఎన్నో అంశాలను నేర్చుకున్నా. ధోనీ ఉన్నాడంటే.. జట్టులో ఎంతో నమ్మకం పెరుగుతుంది. నాకేదైనా సమస్య ఉంటే.. అతడితో పంచుకొంటా. దానికి పరిష్కారం కూడా వస్తుంది. వికెట్ కీపర్, ఆటగాడిగా ఓర్పు అత్యంత కీలకమని ధోనీ నాకిచ్చే సలహా. ప్రశాంతంగా ఉంటూ 100 శాతం ప్రదర్శన ఇచ్చేందుకు ప్రయత్నించాలని చెబుతుంటాడు. నేనెప్పుడూ ధోనీతో నా రికార్డుల విషయాన్ని పోల్చుకోను. క్యాచ్‌లను అందుకోవడం మ్యాచ్‌కు అత్యంత కీలకం. దాని గురించి మరీ ఎక్కువగా ఆలోచించను' అని పంత్ తెలిపాడు.
