చైనాలోని వుహాన్ నగరంలో పురుడుపోసుకున్న కరోనా వైరస్ ఇపుడు ప్రపంచాన్ని పట్టిపీడిస్తోంది. సుమారుగా 192 దేశాలకు ఈ వైరస్ వ్యాపించింది. దీంతో ప్రపంచం గజగజ వణికిపోతోంది. పైగా, ఈ వైరస్ బారినపడి అనేక మంది మృత్యువాతపడుతున్నారు. ముఖ్యంగా, వృద్ధులు ఎక్కువగా ప్రాణాలు కోల్పోతున్నారు. ఈ వైరస్ మరింత వ్యాపించకుండా ఉండేందుకు అనేక దేశాలు లాక్‌డౌన్ ప్రకటిస్తున్నాయి.
ఈ నేపథ్యంలో కరోనా వైరస్ వ్యాప్తిని అరికట్టడానికి ఓ కొత్త పద్ధతి తెరపైకి వచ్చింది. వైరస్ చేరిన వస్తువులను చేత్తో పట్టుకోవడం ద్వారా కరోనా వైరస్ ఎక్కువగా వ్యాప్తి చెందుతోందని తెలిసిందే. వీటిలో తలుపులు తెరిచేప్పుడు డోర్‌నాబ్స్ పట్టుకోవడం, షాపింగ్‌లో కార్ట్స్, ఎలక్ట్రిక్ స్విచ్చులు ఉపయోగించడం కూడా ముఖ్యమైనవే.
అందుకే ఇటువంటి పనులు చేసేటప్పుడు ఎడమచెయ్యి వాడటం ద్వారా వైరస్ బారిన పడకుండా మనల్ని మనం కాపాడుకోవచ్చనేదే ఈ కొత్త విధానం. ఎందుకంటే మనలో దాదాపు 90శాతం మంది కుడిచెయ్యి వాటం కలిగినవాళ్లమే. కాబట్టి మొహాన్ని తాకాలంటే ఎక్కువగా కుడిచేతినే ఉపయోగిస్తాం.
అందుకే ఎడమచేతితో ఇలాంటి పనులు చేయడం ద్వారా కుడి చేతికి వైరస్ సోకదు. ఈ విధానానికి కొరియాలో బాగా ప్రచారం చేయడంతో చాలా మంది దీని వల్ల వైరస్ బారిన పడకుండా తప్పించుకున్నారని తెలుస్తోంది. మరి మనం కూడా దీన్ని ఫాలో అయిపోతే బెటర్. వైరస్ వ్యాప్తిని అరికట్టే చర్యల్లో మనంకూడా భాగస్వాములవుదాం.
