అందంగా, మృదువుగా కనిపించే మెడ భాగాన్ని ఆరోగ్యంగా ఉంచేందుకు కొన్ని జాగ్రత్తలు తప్పనిసరిగా తీసుకోవాలి. మెడ మీద చర్మం సున్నితంగా ఉంటుంది.. కాబట్టి బరబరా రుద్ది శుభ్రం చేయకూడదు. జుట్టు నుండి మెడకు అంటుకునే జిడ్డును తొలగించేందుకు స్నానం చేసేటప్పుడు ప్రత్యేకంగా దృష్టిపెట్టాలి.
మెడ భాగానికి ఆలివ్ నూనెను రాసి మర్దన చేయడం వలన ఆ ప్రాంతమంతా మృదువుగా ఉంటుంది. రాత్రివేళ నిద్రకు ఉపక్రమించే ముందుగా ఆలివ్ నూనెను రాసుకుని ఉదయాన్నే లేవగానే వేనీళ్ళతో శుభ్రం చేసుకుంటే ఫలితం కనిపిస్తుంది.
ఎక్కడికైనా బయటకి వెళ్లి తిరిగి వచ్చినప్పుడు వెంటనే గోరువెచ్చని నీటిలో ముఖాన్ని, మెడను శుభ్రం చేసుకోవాలి. ఆ తరువాత మెత్తని టవల్‌తో తుడుచుకోవాలి. గిల్ట్ నగలు వేసుకోవడం వలన మెడభాగంలో నల్లటి మచ్చలు వచ్చే అవకాశాలు చాలా ఎక్కువగా ఉన్నాయి. ఈ నల్ల మచ్చల కారణంగా దురదలు కూడా వస్తాయి. కాబట్టి గిల్ట్ నగలు ధరించడం మానేయండి.
రోజుకు కనీసం రెండుసార్లు 3 లేదా 4 నిమిషాల పాటు మెడను పైకి ఎత్తడం, వంచడం, అటూ ఇటూ తిప్పడం వంటివి చేయాలి. ఇలా చేయడం వలన కండరాలు చక్కగా పనిచేస్తాయి. కొద్దిగా గ్లిజరిన్ తీసుకుని అందులో కొన్ని చుక్కల నిమ్మరసం కలుపుకోవాలి. ఈ మిశ్రమాన్ని రాత్రివేళ మెడకు రాసుకుని ఉదయాన్నే శుభ్రం చేసుకుంటే కొద్ది రోజుల్లోనే మెడ మెరిసిపోతుంది.
