ఇప్పుడు ఎక్కడ చూసినా మంత్రివర్గ విస్తరణ పైనే పెద్దఎత్తున చర్చ జరుగుతోంది. ఎవరికి మంత్రి పదవి ఉంటుందో.. ఎవరికి మంత్రి పదవి పోతుందో తెలియని పరిస్థితి. అయితే ఆశావహులు మాత్రం విజయసాయిరెడ్డి నమ్మకంతోనే ఉన్నారు. మంత్రి పదవి వస్తుందన్న ధీమాలో ఉంటున్నారు.
ఇప్పటికే 26 జిల్లాలకు చెందిన నేతలకు మంత్రి పదవులు ఉంటాయని ముఖ్యమంత్రి స్పష్టం చేశారు. అన్ని వర్గాలకు సామాజిక న్యాయం చేయాలన్నదే ఆలోచన అని స్పష్టం చేశారు. దీంతో మరింతమంది ఆశలు పెట్టుకున్నారు. ముఖ్యంగా చిత్తూరు జిల్లాకు సంబంధించి ఎమ్మెల్యే రోజాకు సినిమాటోగ్రఫీ శాఖ మంత్రిగా అవకాశం వచ్చిందని.. త్వరలోనే ఆమె పదవిని కూడా అలంకరించడం ఖాయమని పెద్ద ఎత్తున ప్రచారం జరుగుతోంది.
ఇక చిత్తూరు జిల్లాకు చెందిన ప్రభుత్వ విప్‌గా ఉన్న చెవిరెడ్డి భాస్కర్ రెడ్డి కూడా మంత్రుల జాబితాలో ఉన్నట్లు తెలుస్తోంది. విజయసాయి రెడ్డికి అత్యంత సన్నిహితంగా ఉండే చెవిరెడ్డి భాస్కర్ రెడ్డికి స్వయంగా విజయసాయిరెడ్డే ఫోన్ చేసి మంత్రి పదవి ఖాయమైందని చెప్పినట్లు తెలుస్తోంది.
ఇక ఉన్నది రెండేళ్ళు మాత్రమే. ప్రభుత్వ విప్ పదవికి రాజీనామా చేసి మంత్రిగా వెళ్లాలనే ఆలోచనలో చెవిరెడ్డి ఉన్నారట. చెవిరెడ్డికి మంత్రి పదవి వస్తుందని ఎప్పటినుంచో ఆయన అనుచరులు ఆశతో ఉన్నారు. మంత్రుల జాబితాలో చెవిరెడ్డి పేరు ఉందని తెలియడంతో ఎంతో సంతోషంగా ఉన్నారట ఆయన అనుచరులు. అయితే ఇప్పుడే ఈ విషయాన్ని చెప్పొద్దని.. చెవిరెడ్డి అనుచరులకు సూచించారట. మరి చూడాలి మంత్రివర్గంలో పదవులు ఎవరిని వరిస్తాయో... ఎవరిని ఊసూరుమనిపిస్తాయో..
