తెలుగు అకాడమీ నిధుల గోల్ మాల్ కేసులో హైదరాబాద్ సీసీఎస్ పోలీసులు ముగ్గురిని అరెస్ట్ చేశారు. ఏపీ మార్కంటైల్ మ్యూచువల్ కో ఆపరేటివ్ బ్యాంక్ ఉద్యోగి మొహినుద్దీన్‌ను పోలీసులు అరెస్టు చేశారు. ఇప్పటికే ఇద్దరు ఈ కేసులో అరెస్ట్ అయ్యారు.
మూడో వ్యక్తిని శుక్రవారం పోలీసులు అదుపులో తీసుకున్నారు. తెలుగు అకాడమీకి చెందిన డబ్బులను ఆ బ్యాంకుకు బదిలీ చేసినట్లు, అక్కడి నుంచి ఒకరి ఖాతాలోకి డబ్బులు బదిలీ చేసినట్లు పోలీసులు గుర్తించారు. దీంతో అతన్ని అరెస్టు చేశారు.
కాగా, ఏడాది పాటు తెలుగు అకాడమీ చేసిన ఫిక్స్‌డ్ డిపాజిట్ డబ్బులను తీసుకుని వ్యాపారాల్లో పెట్టుబడులు పెడుదామని అనుకున్నానని, ఆ తర్వాత ఆ మొత్తాన్ని గడువులోపల ఫిక్స్‌డ్ డిపాజిట్‌లో చేరుద్దామని అనుకున్నానని ఇప్పటికే అరెస్టయిన యూనియన్ బ్యాంక్ మేనేజర్ మస్తాన్ వలీ పోలీసు విచారణలో చెప్పినట్లు తెలుస్తోంది.
