ఆంధ్రప్రదేశ్ రాష్ట్రంలోని నెల్లూరు జిల్లా నర్సాపురం - ధర్మవరం ఎక్స్‌ప్రెస్ రైలుకు పెను ప్రమాదం తప్పింది. రైలు పట్టాలపై అడ్డుగా ఉన్న రైలు పట్టాలపై ముక్కను ఎక్స్‌ప్రెస్ రైలు ఢీకొట్టింది. అయితే, అదృష్టవశాత్తూ ఈ ఇనుపముక్కం ఎగిరి పక్కన పడటంతో పెను ప్రమాదం తప్పింది. ఈ ఘటన కావలి - బిట్రగుంట స్టేషన్ల మధ్య చోటుచేసుకుంది. ట్రాక్‌పై రైలు పట్టా ముక్కను ఎవరు పెట్టారన్నదానిపై పోలీసులు విచారణ జరుపుతున్నారు.
ఆదివారం తెల్లవారుజామున కావలి - బిట్రగుంట స్టేషన్ల మధ్యలో ముసునూరు వద్ద రైల్వే ట్రాక్‌పై దుండగులు రైలు పట్టాను పెట్టారు. దాదాపు రెండు మీటర్ల పొడవైన రైలు పట్టాను ట్రాక్‌కు అడ్డంగా పెట్టారు. అదే ట్రాక్‌పై నర్సాపూర్ - ధర్మవరం ఎక్స్‌ప్రెస్ రైలు వేగంగా వచ్చింది.
రైలు పట్టాను ఢీ కొట్టగా.. ఆ వేగానికి రైలు పట్టా దూరంగా ఎగిరిపడింది. ఇలా ఎగిరి పక్కన పడడం వల్లే ప్రమాదం తప్పిందని, లేదంటే పెను ప్రమాదం జరిగేదని రైల్వే అధికారులు తెలిపారు. రైలు పట్టాను ట్రాక్‌పై పెట్టిన దుండగులను పట్టుకుని చట్ట ప్రకారం శిక్షిస్తామని పోలీసులు తెలిపారు.
