ప్రమాదాలను నివారించేందుకు వీలుగా ఆర్టీసీ ఉన్నతాధికారులు గట్టి చర్యలు తీసుకుంటున్నారు. ఇందులోభాగంగా, బస్సు డ్రైవర్లకు విధిగా డ్రంక్ అండ్ డ్రైవ్ పరీక్షలను నిర్బంధం చేశారు. అయితే, అయ్యప్ప మాల ధరించిన డ్రైవర్లకు కూడా ఈ తరహా పరీక్షలు చేయడం ఇపుడు వివాదాస్పదంగా మారింది. ఆర్టీసీ అధికారుల చర్యను అయ్యప్ప స్వాములు తీవ్రంగా ఖండిస్తూ తమ నిరసనను వ్యక్తం చేస్తున్నారు.
తెలంగాణ రాష్ట్రంలోని మహబూబాబాద్ - తొర్రూరు పట్టణ కేంద్రంలోని ఆర్టీసీ డిపోలో గురువారం విధులకు హాజరయ్యేందుకు వచ్చే డ్రైవర్లకు డ్రంక్ అండ్ డ్రైవ్ టెస్టులు నిర్వహించారు. అయితే, అయ్యప్ప మాల ధరించిన ఆర్టీసీ డ్రైవర్ నాగరాజుకు కూడా ఈ తరహా పరీక్ష చేశారు.. తాను పవిత్రమైన అయ్యప్ప మాల ధరించానని డ్రంక్ అండ్ డ్రైవ్ టెస్ట్ చేయవద్దని డ్రైవర్ నాగరాజు ఎంత చెప్పినా ఆర్టీసీ అధికారులు పట్టించుకోలేదు. దీంతో నాగరాజు తీవ్ర మనోవేదనకు గురయ్యారు.
