తమిళనాట ఎన్నికల కోలాహలం ముగిసింది. ఎన్నికల ఫలితాల సంగతి ఎలా ఉన్నా... కమల్ తన సినిమాలపై దృష్టి సారించబోతున్నాడు. లోకేశ్ కనకరాజ్ దర్శకత్వంలో నటిస్తున్న 'విక్రమ్' సినిమాను జూన నుంచి పట్టాలెక్కించబోతున్నాడు.
ప్రస్తుతం ప్రీ ప్రొడక్షన్ వర్క్ జరుపుకుంటున్న ఈ సినిమాలో ఇప్పటికే విలన్ గా మలయాళ నటుడు పహాద్ ఫాజిల్‌ను ఎంపిక చేశారు. ఇప్పుడు మరో ముఖ్య పాత్రకు మక్కల్ సెల్వన్ విజయ్ సేతుపతిని ఎంపిక చేశారట.
ఇటీవల ఓ ఇంటర్వ్యూలో ఈ విషయాన్ని విజయ్ సేతుపతి స్పష్టం చేశాడు కూడా. సంక్రాంతికి వచ్చిన లోకేష్‌ కనకరాజ్ 'మాస్టర్'లో విజయ్ సేతుపతి విలన్గా నటించి మెప్పించిన సంగతి అందరికీ తెలిసిందే.
నటనలో ఒకరికి ఒకరు దీటుగా నిలిచే కమల్ హాసన్, విజయ్ సేతుపతి, పహాద్ ఫాజిల్ ఒకే సినిమాలో కనిపించనుండటంతో 'విక్రమ్'పై ఫిల్మ్ సర్కిల్స్‌లో మంచి బజ్ ఏర్పడింది. ఈ సినిమాకు అనిరుధ్ సంగీతాన్ని అందించబోతున్నాడు.
