అతనో డాక్టర్. ఏ ప్రాణి అయిన ప్రాణాపాయ స్థితిలో ఉంటే తన శక్తిమేరకు ప్రాణం పోయాల్సిన వ్యక్తి. కానీ, పశువుగా మారిపోయాడు. తాను ఓ డాక్టర్ అనే ఇంగిత జ్ఞానాన్ని మరిచిపోయాడు. ఓ శునకాన్ని తాడుతో కారుకు కట్టేసి డ్రైవింగ్ చేసుకుంటూ వెళ్లాడు. ఆ కారు వేగానికి ఆ కుక్క పరుగెత్తలేక పోయింది. దీంతో కుక్క కాళ్లు కూడా విరగ్గొట్టుకుంది. ఈ దారుణం రాజస్థాన్ రాష్ట్రంలోని జోధ్‌పూర్ నగరంలో జరిగింది.
ఇందుకు సంబంధించిన వీడియో ఒకటి ఇపుడు సోషల్ మీడియాలో వైరల్ అవుతోంది. ఈ వీడియోను చూసిన నెటిజన్లు తీవ్ర స్థాయిలో మండిపడుతున్నారు. అతనిపై కఠిన చర్యలు తీసుకోవాలంటూ డిమాండ్ చేస్తున్నారు. ఈ డాక్టర్ చేసిన వెధవ పనిని ఓ బైకర్ వీడియో తీసి సోషల్ మీడియాలో షేర్ చేయడంతో ఈ విషయం వెలుగులోకి వచ్చింది. అంతేకాకుండా, బైకర్ వేగం పెంచి కారుకు అడ్డంగా తన బైకును నిలిపి ఆ శునకాన్ని రక్షించాడు.
ఈ వీడియోను డాగ్ హోం ఫౌండేషన్ అనే ఎన్.ఓ.జి సంస్థ ట్విట్టర్‌లో షేర్ చేసింది. శునకాన్ని కుక్క మెడకు పొడవైన తాడు కట్టాడు. ఆ తాడును కారుకు కట్టి ఈడ్చుకెళుతున్న ఆ డాక్టర్‌ను రజనీష్ గల్వాగా గుర్తించారు ఈ వీధి కుక్క తన ఇంటి వద్దే కాపు కాస్తుండటంతో దానిని వదిలించుకునేందుకు ఇలా చేసినట్టు రజనీష్ చెప్పాడు. అయితే, కారు వేగంతో ఆ శునకం పరుగెత్తలేకపోవడంతో పలు చోట్ల కాళ్లకు గాయాలైనట్టు తెలుస్తోంది.
జోధ్‌పూర్ పోలీస్ కమిషనర్ ఈ ఘటనపై కఠిన చర్య తీసుకోవాలని, అతని లైసెన్సును కూడా రద్దు చేయాలని కోరుతూ ప్రపంచ ఆరోగ్య సంస్థను, మేనకా గాంధీని ట్యాగ్ చేసింది. ఆ తర్వాత డాక్టర్‌పై జంతు హింస చట్టం కింద నమోదైన ఎఫ్.ఐ.ఆర్ కాపీని కూడా డాగ్ హోం ఫౌండేషన్ షేర్ చేసింది.
