కర్ణాటక అసెంబ్లీ ఎన్నికలు ముగిశాయి. దీనితో ఎగ్జిట్ పోల్ ఫలితాలు వెలువడ్డాయి. ఎగ్జిట్ పోల్స్ ఫలితాల్లో బీజేపీ- కాంగ్రెస్ పార్టీల మధ్య హోరాహోరీ పోటీ సాగినట్లు తెలుస్తోంది. 2018 ఏడాది మాదిరిగా ఏ పార్టీ కూడా మెజారిటీ సాధించడానికి సగం మార్కును దాటే పరిస్థితి కనబడలేదు. దీంతో రాష్ట్రంలో జేడీ(ఎస్) వరుసగా రెండోసారి కింగ్‌మేకర్‌గా అవతరించే అవకాశం కనబడుతోంది.
ప్రధానమంత్రి నరేంద్రమోదీ నేతృత్వంలోని బలమైన ప్రచారంతో ఉత్సాహంగా ఉన్న బీజేపీ మళ్లీ అధికారంలోకి రావాలని చూస్తుండగా, ఈ అసెంబ్లీ ఎన్నికలలో బలమైన పునరాగమనం చేయాలని కాంగ్రెస్ లక్ష్యంగా పెట్టుకుంది. న్యూస్ నేషన్ సిజిఎస్ అంచనా ప్రకారం కర్నాటక అసెంబ్లీ ఎన్నికల్లో మొత్తం 224 సీట్లకు గాను భాజపాకి 114, కాంగ్రెస్ 86, జెడీఎస్ 21, ఇతరులు 3 చోట్ల విజయం సాధిస్తారు. రిపబ్లిక్ టీవీ ప్రకారం భాజపాకి 85-100 స్థానాలు, కాంగ్రెస్ పార్టీకి 94-108 స్థానాలు, జేడీఎస్ 24-32 స్థానాలు, ఇతరులు 2-4 స్థానాల్లో గెలుస్తారని అంచనా వేసింది. మొత్తమ్మీద జేడీఎస్ కింగ్ మేకర్ అని అన్ని ఎగ్జిట్ పోల్ ఫలితాలు వెల్లడిస్తున్నాయి.
