మంగుళూరుకు చెందిన ఆరుగురు గైనకాలజిస్ట్‌లు నైట్ షిఫ్ట్ పూర్తయిన తర్వాత చేసి డ్యాన్స్ వీడియో ఇప్పుడు నెట్‌లో చక్కర్లు కొడుతోంది. అమెరికన్ జస్టిన్ టింబర్‌లేక్ పాడిన ఓ పాటకు డ్యాన్స్ చేసి తమ ఆనందాన్ని నెటిజన్లతో పంచుకున్నారు. ఆ డ్యాన్స్ చేసిన వారిలో సీనియర్ డాక్టర్ అయిన నీలష్మ సింఘాల్ ఇన్‌స్టాగ్రాంలో వీడియోను పోస్ట్ చేశారు.
డ్యాన్స్ చేసిన సందర్భంలో.. వృత్తికి సంబంధించిన దుస్తుల్లోనే ఉండి.. అందరి మెడలో స్టెతస్కోప్ కనిపించడం విశేషం. రోజూలానే నైట్‌షిఫ్ట్‌ను రొటీన్‌గా ముగించకుండా డ్యాన్స్ చేసిన ఈ గైనకాలజిస్ట్‌ల సంతోషానికి అసలు కారణం వేరే ఉందట.
తన టీం కేవలం 9 రోజుల వ్యవధిలోనే 130 డెలివరీలను విజయవంతంగా పూర్తి చేసిందని.. అందుకే తమ ఆనందాన్ని ఇలా వ్యక్తం చేశామని సింఘాల్ తెలిపారు. ఈ వీడియోకు ఇన్‌స్టాగ్రాంలో దాదాపు 3.2 మిలియన్ల వ్యూస్ రావడం విశేషం. అంతేకాదు, ఇతర సోషల్ మీడియా వేదికలపై కూడా ఈ వీడియో విస్తృతంగా వైరల్ కావడం గమనార్హం.
