మలయాళ సూపర్ స్టార్ మమ్ముట్టి నటించిన యాత్ర శుక్రవారంనాడు విడుదలైంది. పాజిటివ్ టాక్ రావడంతో ఈ చిత్రానికి భారీ కలెక్షన్లు వసూలవుతాయని అంటున్నారు. తెలుగు రాష్ట్రాల్లో ఈ చిత్రం మొదటిరోజు రూ. 5 కోట్లు రాబట్టినట్లు ట్రేడ్ వర్గాలు చెపుతున్నాయి. మరోవైపు యాత్రను చూసేందుకు ప్రత్యేకించి రాయలసీమలో ప్రేక్షకులు ఎగబడుతున్నారు. ఈ ట్రెండ్ ఇలాగే సాగితే యాత్ర భారీ కలెక్షన్లు రాబట్టడం ఖాయం.
దివంగత ముఖ్యమంత్రి వైఎస్ రాజశేఖర రెడ్డి పాదయాత్రకు దేశంలోనే అప్పట్లో చర్చనీయాంశమైంది. వందల కిలోమీటర్ల మేర పాదయాత్ర చేసి ప్రజల కష్టాలను తెలుసుకున్న నాయకుడు వైఎస్సార్. ఆయన చేసిన పాదయాత్ర ఇతివృత్తంగా యాత్ర చిత్రం తెరకెక్కింది. ఈ చిత్రం శుక్రవారం 8న ప్రపంచ వ్యాప్తంగా 970 స్క్రీన్లలో విడుదలైంది. చిత్రానికి పాజిటివ్ టాక్ వచ్చింది.
ప్రేక్షకులంతా వైఎస్సార్‌గా మలయాళ సూపర్ స్టార్ మమ్ముట్టి అదరగొట్టాడని అంటున్నారు. వైఎస్సార్ పాత్రలో రాజన్న తిరిగి వచ్చాడని పోస్టులు పెడుతున్నారు. వైఎస్సార్ పాత్రలో మమ్ముట్టి పరకాయ ప్రవేశం చేశారని పొగడ్తల జల్లు కురిపిస్తున్నారు. మన గడప తొక్కి సాయం అడిగిన ఆడబిడ్డతో రాజకీయం ఏందిరా వంటి డైలాగులకు థియేటర్లలో విజిల్స్ పడుతున్నాయి.
