బుల్లితెర నటి వీజే చిత్ర నటించిన మొదటి చివరి చిత్రం 'కాల్స్'.. ఇదే ఆమె చిత్రం కూడాను. ఈ మూవీని క్రైమ్‌ థ్రిల్లర్‌, సోషియో డ్రామాగా తెరకెక్కించారు. ఈ చిత్ర ట్రైలర్ ఇటీవల విడుదలకాగా, దానికి మంచి స్పందన లభించింది. ఇప్పటికే మిలియన్‌ నెటిజన్లు దీనిని వీక్షించారు. బుల్లితెరలో అనేక సీరియల్స్‌లో నటిస్తూ తనకంటూ ప్రత్యేక గుర్తింపును సొంతం చేసుకున్న వీజే చిత్ర గత ఏడాది ఆత్మహత్య చేసుకుంది.
ఈ క్రమంలో ఆమె నటించిన 'కాల్స్' విడుదలకు సిద్ధమవుతుంది. ఆమె మరణానంతరం విడుదలైన ఈ చిత్రం ట్రైలర్‌కు మంచి స్పందన రావడంతో సినిమా కూడా మంచి విజయం సాధిస్తుందని, ఈ సినిమాను ఆమెకు అంకితమిస్తున్నామని నిర్మాతలు తెలిపారు. జె.శబరీష్‌ దర్శకత్వం వహించిన ఈ చిత్రాన్ని ఎస్‌.జయకుమార్‌, జె.కావేరి సెల్వి, జె.శబరీష్‌ సంయుక్తంగా నిర్మించగా, తమీమ్‌ అన్సారీ సంగీతం సమకూర్చారు.
ఇన్‌ఫైనైట్‌ పిక్చర్స్‌ బ్యానర్‌పై ఎస్‌.జయకుమార్‌, జే. కావేరి సెల్వి నిర్మాణంలో 2019 జూలైలో ‘కాల్స్’ చిత్రం షూటింగ్ ప్రారంభమైంది. జె.శబరీష్‌ దర్శకత్వం వహించిన ఈ సినిమా షూటింగ్ చెన్నై, తంజావూరు, తిరుచ్చి, వారణాసి తదితర ప్రాంతాల్లో జరిగింది.
ఢిల్లీ గణేష్‌, నిళల్‌గళ్‌ రవి, ఆర్‌.సుందరరాజన్‌, దేవదర్శిని, వినోదిని, వైద్యనాధన్‌, జీవా రవి, శ్రీరంజని తదితరులు కీలక పాత్రల్లో నటించారు. ఈ సినిమా షూటింగ్ జనవరిలోనే పూర్తి కావడంతో అన్ని కార్యక్రమాలు పూర్తి చేసుకుని జులై నెలలో విడుదల చేయాలనుకున్నారు.
అయితే లాక్‌డౌన్ కారణంగా ఈ సినిమా వాయిదా పడింది. జనవరిలో ఈ చిత్రాన్ని రిలీజ్ చేసేందుకు సన్నాహాలు చేస్తున్న సమయంలో చిత్ర ఆత్మహత్య చేసుకోవడం అందరినీ షాక్‌కు గురిచేసింది. ప్రస్తుతం ఆమె ఈ లోకంలో లేకపోయినా వీజే చిత్ర కాల్స్ సినిమా మంచి గుర్తింపు లభించే అవకాశం వుందని సినీ పండితులు సెలవిస్తున్నారు.
