కేన్సర్ మహమ్మారిబారినపడి చావుబతుకుల మధ్య కొట్టుమిట్టాడుతున్న ఓ వీరాభిమానికి హీరో ప్రభాస్ వీడియో కాల్ చేసి ఆశ్చర్యపరిచాడు. దీంతో ఆ అభిమాని ఆనందపరవశంలో మునిగిపోయింది. ఈ సంఘటన హైదరాబాద్ నగరంలో జరిగింది.
తాజాగా వెలుగులోకి వచ్చిన ఈ వివరాలను పరిశీలిస్తే, శోభిత అనే అమ్మాయి ప్రభాస్ వీరాభిమాని. ఈమె కేన్సర్ బారినపడి హైదరాబాద్‌లోని ఓ ఆస్పత్రిలో చికిత్స పొందుతూ వస్తోంది.
ఇటీవల ఆమె వైద్యులతో మాట్లాడుతూ, తాను ప్రభాస్ అభిమానినని, అతడితో మాట్లాడాలని ఉందని చెప్పింది. వైద్యుల ద్వారా విషయం తెలుసుకున్న ప్రభాస్ శనివారం వీడియో కాల్ చేసి శోభితతో సరదాగా ముచ్చటించాడు.
అభిమాన హీరో నుంచి ఫోన్ రావడంతో ఉబ్బితబ్బిబ్బయిన శోభిత తన బాధను మర్చిపోయి ప్రభాస్‌తో ఆనందంగా మాట్లాడింది. ఇందుకు సంబంధించిన ఫొటోలు సోషల్ మీడియాలో వైరల్ అవుతున్నాయి. అభిమానులకు ఫోన్ చేసి సర్‌ప్రైజ్ ఇవ్వడం ప్రభాస్‌కు కొత్తకాదు. గతంలో మిర్చి సినిమా షూటింగ్ సందర్భంగా భీమవరంలో మృత్యువుతో పోరాడుతున్న 20 ఏళ్ల అభిమానితోనూ ప్రభాస్ ఇలాగే ముచ్చటించాడు.
