టాలీవుడ్‌లో సంక్రాంతి సందడి మొదలైంది. సాధారణంగా సంక్రాంతి తెలుగిళ్లల్లో చాలా సందడిగా ఉంటుంది... అయితే టాలీవుడ్‌లో కూడా అదే సందడి ఉంటుందనేది అందరికీ తెలిసిన విషయమే. కాగా, ఈ సంక్రాంతికి సందడి చేసేందుకు సూపర్‌స్టార్ అలాగే స్టైలిష్ స్టార్ కూడా రెడీ అయిపోయారు.
వివరాలలోకి వెళ్తే... టాలీవుడ్‌లో సూపర్‌స్టార్ మహేష్ బాబు నటించిన సరిలేరు నీకెవ్వరు అలాగే స్టైలిష్ స్టార్ అల్లు అర్జున్ నటించిన అల వైకుంఠపురంలో సినిమాలు రెండూ కూడా ఈ సంక్రాంతికి విడుదల కాబోతున్న విషయం అందరికీ తెలిసిందే. ఈ నేపథ్యంలో సంక్రాంతికి విడుదల కాబోతున్న ఈ రెండు సినిమాల రిలీజ్ డేట్ పోస్టర్లు తాజాగా విడుదలయ్యాయి. అయితే, ఈ రెండు సినిమాలకు సంబంధించిన పోస్టర్లు ఒకేలా కనిపిస్తూండడం ఇక్కడ చర్చనీయాంశమైంది.
అయితే.. తాజాగా విడుదల చేయబడిన ‘సరిలేరు నీకెవ్వరు’ పోస్టర్‌లో మహేష్ బాబు కొండారెడ్డి బురుజు ముందు ఓ బల్లపై కూర్చుని పక్కకు చూస్తూ నవ్వుతున్నట్లు కనిపిస్తున్నారు. ఇక ‘అల వైకుంఠపురంలో’ సినిమా పోస్టర్‌ను చూస్తే అల్లు అర్జున్ ఓ గట్టుపై తాపీగా కూర్చుని సిగరెట్ కాలుస్తూ నవ్వుతున్నట్లు కనిపిస్తున్నారు.
మొత్తానికి ఈ ఇద్దరు స్టార్ హీరోలు కూర్చుని ఇచ్చిన పోజ్ మాత్రం కేక పెట్టిస్తోంది. మరి సంక్రాంతి బరిలోకి దూకుతున్న ఈ రెండు సినిమాలకు పోస్టర్లు ఒకే విధంగా ఉన్నా, ప్రేక్షకులు దేనిని ఎక్కువగా ఆదరిస్తారో వేచి చూద్దాం..
