సాయిపల్లవి పాటలు యూట్యూబ్‌లో రికార్డ్ సృష్టిస్తున్నాయి. వచ్చిండే, రౌడీ బేబీ పాటలు ఇప్పటికే ట్రెండ్ సెట్ చేశాయి. ఈ కోవలోనే ఇప్పుడు లవ్ స్టోరీ సినిమాలోని సారంగ దరియా పాట గత వారం రోజులుగా యూట్యూబ్‌లో రికార్డులు తిరగరాస్తోంది. ప్రేక్షకులు కూడా ఈ జానపద గేయానికి జై కొడుతున్నారు. అయితే ఈ పాటపై ఇప్పుడు వివాదం చెలరేగుతోంది.
సాధారణంగా జానపద గేయాలు సినిమాలో తీసుకున్నప్పుడు ఒరిజినల్ సింగర్ నుంచి అనుమతి తీసుకోవాలి. వాళ్లకు క్రెడిట్స్‌ ఇవ్వాల్సిందే. లేదంటే చిక్కులు తప్పవు. ఇప్పుడు 'సారంగ దరియా..' పాటపై కూడా ఇలాంటి వివాదమే మొదలైంది. పల్లెల్లో ఉన్న ఈ పాటను వెలుగులోకి తీసుకొచ్చింది తానేనంటూ మీడియా ముందుకొచ్చింది కోమలి అనే జానపద గాయని. సారంగదరియా పాట అమ్మమ్మ దగ్గర నుంచి నేర్చుకున్నానని.. ప్రజలకు చేరువ చేసింది తాను కాబట్టి ఈ సాంగ్‌ తన సొంతమని చెప్తుంది ఈమె.
అప్పట్లో స్టార్ మాలో వచ్చిన రేలారే రేలా ప్రోగ్రాం సమయంలో సుద్దాల అశోక్‌ తేజ తన పాట విన్నాడని.. ఇప్పుడు లవ్ స్టోరీలో ఈ పాటను వాడుకున్నారని తెలియగానే అశోక్‌ తేజకు ఫోన్‌ చేశానని చెప్పింది కోమలి. ఇది ఎవరి సొంతం కాదు.. నువ్వు పుట్టక ముందే ఈ పాట నా దగ్గరుంది అని చెప్పాడని చెప్పుకొచ్చింది. కానీ ఈ పాటను ఆయన ఎప్పుడూ వెలుగులోకి తీసుకురాలేదని తెలిపింది.
సినిమాలో ఈ పాట తనతో పాడించనందుకు బాధేసిందని.. తన బాధను చూసి నెక్స్ట్‌ సినిమాలో అవకాశం ఇస్తానని శేఖర్ కమ్ముల హామీ ఇచ్చారని చెప్పింది కోమలి. కానీ ఈ పాట విషయంలో తనకు రావాల్సిన గుర్తింపు రాలేదని ఇవ్వాల్సిన పేరు ఇవ్వలేదని కోమలి మీడియా ముందు చెప్పింది. మరి ఈ వివాదానికి సాఫ్ట్ డైరెక్టర్ శేఖర్ కమ్ముల ఎలా ఫుల్ స్టాప్ పెడతాడో చూడాలి.
