కరోనా లాక్డౌన్ సమయంలో అందుబాటులోకి వచ్చిన ఓటీటీ ఫ్లాట్‌ఫామ్‌ ఆహా. తెలుగు బుల్లితెరపై అక్కినేని వారి కోడలు, అందాల నటి సమంత తొలిసారిగా హోస్ట్‌గా వ్యవహరించింది. అదే 'సామ్ జామ్'. ఈ పేరు, తొలి ట్రయిలర్ విడుదల కాగానే అంచనాలు ఎంతో పెరిగాయి.
షో ప్రారంభమైన తర్వాత ప్రేక్షకుల నుంచి అంత స్పందన రాలేదు. ఇది టీవీ చానెల్స్‌లో ప్రసారం కాకపోవడం, కేవలం ఓటీటీ ప్లాట్ ఫామ్‌గా ఉన్న 'ఆహా'లో మాత్రమే విడుదల అవుతుండటంతో దీనికి వీక్షకుల నుంచి అతి తక్కువ స్పందన వచ్చినట్టు సమాచారం. దీంతో కార్యక్రమాన్ని ముందుగా అనుకున్నన్ని ఎపిసోడ్లు కాకుండా, ముందుగానే గుమ్మడి కాయ కొట్టేసినట్టు తెలుస్తోంది.
తొలి సీజన్‌లో మొత్తం పది షోలను చిత్రీకరించాలని నిర్మాతలు ప్లాన్ చేశారు. ఇందులోభాగంగా, మెగాస్టార్ చిరంజీవి, స్టైలిష్ స్టార్ అల్లు అర్జున్‌ వంటివారితో ఎపిసోడ్లు నిర్వహించారు. అయితే, చివరి సీజన్‌లో సమంత భర్త నాగ చైతన్య ఇంటర్వ్యూ వచ్చింది.
అంతకుముందు అల్లు అర్జున్‌తో వచ్చిన ఎపిసోడ్ సైతం తీవ్ర నిరాశ పరిచిందని రేటింగ్స్ తెలుపుతున్నాయి. ఇక ఈ షో కేవలం యూట్యూబ్‌లోని చానెళ్లు, సినిమా వార్తలు రాసుకునే వెబ్‌సైట్లకు కొన్ని వార్తలను ఇచ్చిందే తప్ప, తెలుగు సినీ, టీవీ ప్రేక్షకులను అలరించలేదని సినీ విశ్లేషకులు అంచనా వేశారు.
