తెలుగు, తమిళ హీరో విశాల్‌పై ఆయన ప్రొడక్షన్ ఆఫీసులో పని చేసే రమ్య అనే మహిళ సంచలన ఆరోపణలు చేసింది. విశాల్ పైకి మాత్రమే హీరో అని, వాస్తవానికి పెద్ద విలన్ అని ఆరోపించింది. అందుకు సంబంధించిన ఎన్నో ఆధారాలు తన వద్ద ఉన్నాయని వెల్లడించింది.
గత వారంలో తన ప్రొడక్షన్ హౌస్‌లో ఆరేళ్లుగా పనిచేసిన రమ్య అనే మహిళ, దాదాపు రూ.45 లక్షలు కాజేసిందని హీరో విశాల్ ఫిల్మ్ ఫ్యాక్టరీ ప్రొడక్షన్‌లో మేనేజరుగా పని చేసే హరి పోలీసులకు ఫిర్యాదు చేశాడు. హీరోగానే కాకుండా, నిర్మాతగానూ విశాల్ ఫిల్మ్ ఫ్యాక్టరీ బ్యానర్ పై సినిమాలు తీస్తున్న ఆయన, హరి, రమ్య అనే ఇద్దరిని ఉద్యోగులుగా నియమించుకోగా, ఇరువురూ కలిసి ఆరేళ్ల వ్యవధిలో లక్షల డబ్బు కొట్టేశారన్నది విశాల్ అభియోగం.
ఈ ఆరోపణలపై రమ్య ఘాటుగా స్పందించింది. పైకి హీరోలా కనిపించే విశాల్, వాస్తవానికి పెద్ద విలన్ అని, తాజాగా మీడియాతో మాట్లాడిన ఆమె, తన వద్ద ఉన్న వివరాలన్నీ చెబితే, విశాల్ నిజస్వరూపం బయట పడుతుందని హెచ్చరించింది. తాను ఎవరినీ మోసం చేయలేదని స్పష్టం చేసిన ఆమె, మహిళను కావడం వల్లే బెదిరిస్తున్నారని వాపోయింది.
తాను ఇంతకాలమూ ఎంతో సైలెంట్‌గా ఉన్నానని, ఇప్పుడు తనపైనే ఆరోపణలు వచ్చాయి కాబట్టి, సమయం వచ్చినప్పుడు అన్నీ బయటపెడతానని, దాంతో విశాల్ విషయం అందరికీ తెలుస్తుందని వ్యాఖ్యానించింది.
