పవర్ స్టార్ పవన్ కళ్యాణ్ నటించిన తాజా చిత్రం "వకీల్ సాబ్". వేణూ శ్రీరామ్ దర్శకత్వం వహించిన ఈ చిత్రాన్ని ప్ర‌ముఖ నిర్మాత బోనీ క‌పూర్ స‌మ‌ర్ప‌ణ‌లో శ్రీ వెంక‌టేశ్వ‌ర క్రియేష‌న్స్‌, బే వ్యూ ప్రాజెక్ట్స్ ప‌తాకాల‌పై దిల్‌ రాజు, శిరీష్ ఈ చిత్రాన్ని నిర్మించారు. ప్ర‌పంచవ్యాప్తంగా ఈ చిత్రం ఏప్రిల్ 9న విడుదల కాబోతోంది.
దాదాపు 3 సంవత్సరాల గ్యాప్‌ తర్వాత పవన్ కల్యాణ్ నటించిన సినిమా కావడంతో ఈ సినిమాపై ఇప్పటికే భారీగా అంచనాలున్నాయి. అలాగే ఇప్పటివరకు ఈ సినిమాకు సంబంధించి విడుదలైన పాటలు, టీజర్, ట్రైలర్‌.. ఓ రేంజ్‌లో ఉండటంతో.. పవన్ కెరీర్‌లో మరో బ్లాక్‌బస్టర్‌ పక్కా అనేలా అప్పుడే ఇండస్ట్రీ అంతా చర్చలు నడుస్తున్నాయి.
తాజాగా ఈ సినిమాకు సంబంధించి సెన్సార్ కార్యక్రమాలు పూర్తయినట్లుగా చిత్రయూనిట్ అఫీషియల్‌గా ఓ పోస్టర్‌ను విడుదల చేసింది. సెన్సార్ నుంచి యుబైఏ సర్టిఫికెట్‌ అందుకున్న ఈ చిత్రం.. ఏప్రిల్ 9న థియేటర్లలోకి వచ్చేందుకు అన్ని కార్యక్రమాలను పూర్తి చేసుకుంది. అలాగే సెన్సార్ సభ్యులు కూడా ఈ చిత్రం రూపొందిన తీరుపై ప్రత్యేక అభినందనలు తెలిపినట్లుగా తెలుస్తుంది.
154 నిమిషాల నిడివి గల ఈ సినిమాలో పవన్ ఎంట్రీ, కోర్టు సీన్లు.. సినిమాకి హైలెట్‌గా ఉన్నాయని, "పింక్", "నెర్కొండ పార్వై"లోని మెయిన్‌ కథాంశాన్ని మార్చకుండా.. సరికొత్తగా 'వకీల్ సాబ్'ని వేణు శ్రీరామ్ చిత్రీకరించినట్లుగా సెన్సార్ వర్గాల ద్వారా తెలుస్తుంది.
