మన్మథుడు-2లో నటిస్తున్న అక్కినేని నాగార్జున ప్రస్తుతం టాప్ రేటింగ్ షో బిగ్ బాస్ మూడో సీజన్‌కు వ్యాఖ్యాతగా వ్యవహరించేందుకు సిద్ధమవుతున్నాడు. ఈ నేపథ్యంలో బిగ్ బాస్-3 అక్కినేని నాగార్జున యాంకరింగ్‌పై.. తాజాగా ప్రముఖ రచయిత పరుచూరి గోపాలకృష్ణ తన అభిప్రాయాన్ని పంచుకున్నారు.
చిన్న రామయ్య(జూనియర్ ఎన్టీఆర్) మాసీగా చేశాడని, సీజన్-2ను నాని క్లాసీగా చేశాడని కానీ నాగ్ ‘మన్మథుడు’లా చేశారని తాజాా ప్రోమోను బట్టి తెలుస్తోందని వ్యాఖ్యానించారు.
తాజాగా హోస్ట్ విషయంలో మాటీవీ క్లారిటీ ఇస్తూ.. బిగ్ బాస్-3కి సంబంధించిన ప్రోమోలను విడుదల చేసింది. ఈ ప్రోమోలు ప్రస్తుతం నెట్టింట వైరల్ అవుతున్నాయి. ఈ ప్రోమోలను బట్టి చూస్తే.. నాగార్జున బిగ్ బాస్-3కి వ్యాఖ్యాతగా వ్యవహరిస్తారని ఖరారైపోయింది.
దీనిపై పరుచూరి మాట్లాడుతూ.. 14 మంది వ్యక్తిత్వాలను బయట కూర్చొన్న వ్యక్తి విశ్లేషించడం సాధారణ విషయం కాదని, కానీ చిన్న రామయ్య దానిని అవలీలగా చేస్తే.. నాని హోస్టింగ్‌ ద్వారా ఈ షోను చాలా క్లాసీగా, అద్భుతంగా నడిపాడని తెలిపారు.
ఇక నాగార్జున ‘మన్మథుడు’లా చేశారని ప్రోమోని బట్టి అర్థమవుతోందన్నారు. ఈ కార్యక్రమం చూసే మహిళా ప్రేక్షకులు, బిగ్ బాస్ ఇంట్లో ఉండే కంటెస్టెంట్లను చూడాలా? లేదంటే నాగ్‌ని చూడాలో అర్థం కాక తికమక పడతారని పరుచూరి గోపాలకృష్ణ తెలిపారు. ఈ సందర్భంగా నాగ్‌తో పాటు కంటెస్టంట్లందరికీ ఆయన శుభాకాంక్షలు తెలియజేశారు.
