టాలీవుడ్, బాలీవుడ్ అన్నిచోట్లా బయోపిక్‌ల పరంపర కొనసాగుతోంది. ఎంతో ఆసక్తి నెలకొన్న ప్రముఖ బ్యాడ్మింటన్ క్రీడాకారిణి సైనా నెహ్వాల్ బయోపిక్‌లో కొత్త మలుపు చోటుచేసుకుంది. అమోల్ గుప్తే డైరెక్ట్ చేస్తున్న ఈ బయోపిక్‌లో బాలీవుడ్ బ్యూటీ శ్రద్దా కపూర్‌ను సైనా పాత్రకు ఎంపిక చేసారు. ఇందుకోసం ఆమె బ్యాడ్మింటన్ శిక్షణ కూడా తీసుకున్నారు. వర్క్‌షాప్‌లు, శిక్షణ అంటూ హడావిడి అయ్యాక ఈ తరుణంలో బయోపిక్ నుండి ఆమె తప్పుకోవడం చర్చనీయాంశమైంది.
మీడియా కథనం ప్రకారం షూటింగ్ లేటుగా మొదలు కానుండటంతో వేరే సినిమాల డేట్స్‌తో క్లాష్ ఏర్పడినట్లు, అందువలనే శ్రద్ధా కపూర్ ఈ క్రేజీ ప్రాజెక్ట్ నుండి తప్పుకోవాల్సి వచ్చినట్లు తెలుస్తోంది. డైరెక్టర్లు, నిర్మాతలు మరియు శ్రద్ధా కపూర్ పరస్పర అంగీకారంతోనే ఈ నిర్ణయం తీసుకున్నట్లు ప్రకటించారు. ఐతే పొద్దస్తమానం బ్యాడ్మింటన్ బ్యాటు తీసుకుని ప్రాక్టీసు చేయాలని అంటుండంతో శ్రద్ధా వళ్లు హూనం అవుతోందట. దీని కారణంగా బుగ్గలు లోపలికి పీక్కుపోయి అంటు దవడల్లా మారిపోతున్నాయట. అందుకే ఆమె తప్పుకుందనే ప్రచారం జరుగుతోంది.
ఐతే ఈ సినిమా నిర్మాత భూషణ్ మాట్లాడుతూ శ్రద్ధా కపూర్ తప్పుకోవడం అనేది మ్యూచువల్ అండర్‌స్టాండింగ్ అని, ఆ స్థానంలో పరిణీతి చోప్రాను తీసుకుంటున్నట్లు తెలిపారు. ఈ ఏడాదిలో షూటింగ్ ముగించి, 2020లో ఈ సినిమాను రిలీజ్ చేయనున్నట్లు తెలిపారు. ఒలింపిక్స్ కూడా 2020లోనే ఉండటంతో ఆ సమయంలో రిలీజ్ చేయడం గర్వంగా ఉందని పేర్కొన్నారు.
