గూగుల్ మ్యాప్స్‌లో మెగాస్టార్ చిరంజీవి ముఖ చిత్రం ఆవిష్కృతమైంది. ఈ చిత్రాన్ని ఆయన ఫ్యాన్స్ గీసి.. తమ అభమానాన్ని చాటుకున్నారు. ఇపుడు గూగుల్‌కెక్కిన అభిమానం ప్రస్తుతం నెట్టింట వైరల్‌గా మారింది. ఈ వివరాలను పరిశీలిస్తే, హైదరాబాద్ నగర గూగుల్ మ్యాపై మెగాస్టార్ చిత్రాన్ని గీసేందుకు మెగా అభిమానులు కొందరు ఆయన ముఖాకృతిని పోలిన రూట్ మ్యాప్‌ను ఎంచుకున్నారు.
ఇందుకోసం మొత్తం 800 కిలోమీటర్ల మేర చెక్ పాయింట్స్ పెట్టుకుని అనేక మంది వివిధ వాహనాల్లో గూగుల్ నావిగేషన్ ఆధారంగా ఆయా మార్గాల్లో ప్రయాణించారు. వారు ప్రయాణించిన రూట్లన్న కలపగా గూగుల్ మ్యాప్ పై అద్భుతమైన మెగాస్టార్ చిరంజీవి ముఖచిత్రం ఆవిష్కృతమైంది.
తమ ప్లాన్ సక్సెస్ అయ్యేందుకు వారు ఏకంగా 15 రోజుల పాటు శ్రమించారు. క్షేత్రస్థాయిలో పర్యటించిన మరీ పక్కాగా ప్లాన్ చేసిన అభిమానులు మెగాస్టార్‌కు అద్భుతమైన బహుమతిని ఇస్తూ తమ అభిమానాన్ని ప్రత్యేకంగా చాటుకున్నారు.
ఇదిలావుంటే, మెగాస్టార్ చిరంజీవి నటించి "భోళాశంకర్" చిత్రం శుక్రవారం ప్రపంచ వ్యాప్తంగా విడుదలైంది. దీంతో సినిమా థియేటర్ల వద్ద మెగా అభిమానుల సంబరాలు మిన్నంటాయి. మెహర్ రమేష్ దర్శకత్వం వహించిన ఈ చిత్రంలో కీర్తి సురేష్ చెల్లిగాను, తమన్నా హీరోయిన్‌గా నటించారు.
