యాంకర్ ప్రదీప్ మాచిరాజు హీరోగా పరిచయమవుతున్న చిత్రం 30 రోజుల్లో ప్రేమించటం ఎలా? ఈ చిత్రానికి మున్నా దర్శకత్వం వహిస్తున్నారు. ఎస్వీ ప్రొడక్షన్స్ బ్యానర్ పైన ఎస్వీ బాబు నిర్మించిన ఈ చిత్రంలో ప్రదీస్ సరసన అమృతా అయ్యర్ నటించింది. ఇటీవల ఈ సినిమా సెన్సార్ కార్యక్రమాలు పూర్తిచేసుకుంది. ఈ సినిమాని చూసిన సెన్సార్ సభ్యులు ఒక దృశ్యకావ్యంగా ఈ సినిమా ఉందని అభినందించినట్లు చిత్ర బృందం తెలియచేసింది.
ఇదిలా ఉంటే... సూపర్‌స్టార్ మహేష్ బాబు చేతుల మీదుగా లాంఛ్ అయిన నీలినీలి ఆకాశం.. అంటూ సాగే పాట సంగీత ప్రపంచంలో ఒక సంచలనం సృష్టించింది. ఈ పాట యూట్యూబ్‌లో ఇప్పటివరకు 60 మిలియన్ వ్యూస్ సాధించడం విశేషం.
స్టార్ హీరో నటించిన సినిమాలో పాట 60 మిలియన్ వ్యూస్ సాధించింది అంటే.. ఆయా స్టార్ హీరోకున్న ఫ్యాన్ ఫాలోయింగ్ వలన సాధ్యమౌతుంది కానీ.. చిన్న సినిమాలో పాటకు ఈ స్థాయిలో వ్యూస్ వచ్చాయంటే... ఈ పాట ఎంతగా నచ్చేసిందో అర్ధం చేసుకోవచ్చు.
చిన్న సినిమా పాటల్లో ఇదే పెద్ద విజయం.. పెద్ద రికార్డ్ అని చెప్పచ్చు. ఈ పాటకు సాహిత్యం చంద్రబోస్ అందించగా, సంగీతం అనూప్ రూబెన్స్ అందించారు. దాశరథి శివేంద్ర కెమెరా వర్క్ ఈ పాటకు అద్భుతంగా సెట్ అయ్యింది. సాహిత్యం, సంగీతంతో పాటు అద్భుతమైన సినిమాటోగ్రఫీ కూడా తోడవ్వడంతో ఈ పాట ఈ స్థాయి విజయాన్ని సాధించిందని చెప్పచ్చు.
ఈ సినిమాలోని పాటే ఇంత అద్భుతంగా ఉంటే.. సినిమా ఇంకెంత అద్భుతంగా ఉంటుంది.? అసలు.. 30 రోజుల్లో ప్రేమించటం ఎలా..? ఈ సినిమా ద్వారా ఏం చెప్పనున్నారు.? ఇలా ఈ సినిమాకి సంబంధించి ఎన్నో ప్రశ్నలు. ఈ ప్రశ్నలు అన్నింటికి ఈ సినిమానే సమాధానం చెబుతుంది అంటున్నారు చిత్ర యూనిట్. నీలి నీలి ఆకాశం.. సాంగ్‌కు ట్రెమండస్ రెస్పాన్స్ రావడంతో ఈ సినిమాని తమ ఏరియాల్లో మేము రిలీజ్ చేస్తామంటే.. మేము రిలీజ్ చేస్తామని.. డిస్ట్రిబ్యూటర్స్ ముందుకు వచ్చారని తెలిసింది.
లేటెస్ట్ న్యూస్ ఏంటంటే... ఈ సినిమాని ప్రముఖ నిర్మాణ సంస్థలు జీఏ2, యు.వి. క్రియేషన్స్ సంస్థలు రిలీజ్ చేస్తున్నాయి. సినిమా బాగుంటేనే ఈ సంస్థలు రిలీజ్ చేయడానికి ముందుకు వస్తుంటాయి. ఈ సినిమాని ఈ రెండు పెద్ద సంస్థలు కలిసి రిలీజ్ చేస్తున్నాయంటే... ప్రదీప్ లక్కీ ఛాన్స్ కొట్టేసినట్టే.
ఈ చిత్రంలో హీరో ప్రదీప్ రెండు షేడ్స్ ఉన్న క్యారెక్టర్లో కొత్తగా కనిపిస్తారని.... ఆ రెండు పాత్రల్లో ఆయన నటన ప్రేక్షకుల్ని విశేషంగా ఆకట్టుకుంటుంది. హీరోహీరోయిన్ల మధ్య సన్నివేశాలు ఎమోషనల్‌గా ఉండి అలరిస్తాయి అని డైరెక్టర్ తెలియచేసారు.
అనూప్ రూబెన్స్ సంగీతం, చంద్రబోస్ సాహిత్యం, దాశరథి శివేంద్ర సినిమాటోగ్రఫీ ఈ చిత్రానికి హైలెట్‌గా నిలుస్తాయని.. దర్శకునికి ఇది తొలి సినిమా అయినప్పటికీ ఒక దృశ్య కావ్యంలా చిత్రాన్ని రూపొందించారు. లవ్ ఎంటర్టైనర్‌గా సినిమా అలరిస్తుంది. ఈ విభిన్న ప్రేమకథా చిత్రాన్ని మార్చి 25న రిలీజ్ చేయనున్నట్టు చిత్ర నిర్మాత తెలియచేసారు.
